Алфавитдиз мугьманвиле

АЛФАВИТ вуч ятIа гаф,
Заз са жуьре чир хьана.
Амма адан гьар са гьарф,
Зун паталди сир хьана.
 
А - гьарфунихъ кьетIенвал
Ава, халис игитдин.
Адахъ ава уьткемвал,
Кьиле хьун алфавитдин!
 
Б - гьарф – чIехи буба я,
Ам чи баде, бах я чи.
Гьунарриз ам зурба я,
Кьисмет хьанвай бахт я чи!

В - гьарфунихъ кьил ава,
Дустар вичел чIугвадай.
ЧIехи тир кьве вил ава,
Вилик физ, рехъ аквадай!
 
Г – гьарфни чаз герек я,
КIелиз, кхьиз чир ийиз.
Дуствал хуьниз зирек я,
Вичикай кьве кIир ийиз!
 
Гъ – гьарфунихъ, гъваш лугьуз,
Школадиз аялар;
Вилик къачу кIвач лугьуз,
Ава къени хиялар!
 
Гь – гьарфуниз гьахъ кIанда,
Гьялдай чIавуз месэла.
Таб гаф адаз дакIанда,
Гьахъ алудиз рикIелай!

Д – гьарфунихъ тик далу
Гала чIехи дагъ хьтин.
Дуьзвал кIанда акьуллу,
Бул бегьердиз багъ хьтин!
 
Е – гьарф – еб я цIил хьтин,
Куьруь ийиз кьатIнавай.
Ризкьи – ем я, къуьл хьтин,
Санал гатIуз кIватIнавай.
 
Ё—гьарфни чун дустар жезва,
Ёлка туькIуьрдай чIавуз.
Аяз буба устIар жезва,
Эквер куькIуьрдай чIавуз.
 
Ж – гьарфуни сирнавар
Ийида кьве патахъди.
ТIарам кьуна жилавар,
Ялда тек са къвалахъди!
 
З – гьарф, гьелбет, вилик физ,
Зарбвал, йигин зегьмет я.
Са кьатI пер хьиз, чилик физ,
Адаз хуш кар гьуьрмет я!
 
И – гьарфуниз инсанвал
КIанда илим чир ийиз.
Хуш я рикIиз хъсанвал,
Гьар кIваликай хуьр ийиз!
 
Й – гьарфуниз рагъ алай
Йикъар  кIанда хьайитIа.
Йифер, вилел нвагъ алай,
Хуш туш, марфар къвайитIа!
 
К – гьарфуниз физ вилик,
КIанда даим килигиз.
Ачух сесер кьаз гъилик,
КIанда вичихъ гилигиз!
 
Къ – гьарфуниз нез къафун,
КIанда гьар къуз фахъ галаз.
Вилик кватIан буш руфун,
Дуьзвал кIанда гьахъ галаз!
 
Кь – гьарфуниз са кьадар
Кьенят, кьутIун хуш я кар.
Келле авай арифдар,
КIанда тавун кар – инкар!
 
КI – гьарфуниз кIел авун
КIанда, кIватIун, пай авун,
Месэлаяр гьял авун,
Эверайдаз гьай лугьун!
 
Л – гьарф я са аламат,
Къекъведай кьве кIвачелди.
Ам сагъни я, саламат,
Гьарфар чIугваз вичелди!
 
М – гьарфуниз – маншаллагь!
Ам масадахъ муьгьтеж туш.
Кхьиз хуш гьарф я, валлагь,
КIел ийизни рикIиз хуш!
 
Н – гьарфуниз намуслу
КIада чIугун зегьметар.
Кар вичелай тир аслу,
Багьабур тир къиметар!
 
О – гьарфунихъ, - кьил элкъвей,
Ава ракъин экв авай.
АватIани вил элкъвей,
Къир хьиз я ам тIвек авай!
 
П – гьарфуниз – пис-хъсан, 
Чириз кIанда виридаз.
Пара кьадар невс - нукьсан,
Я инсан яз хайидаз!
 
ПI – гьарфузиз пIинияр
Чарай чими вахт кIанда.
ПипIиш, хинкIар кинияр,
ТIуьн паталди бахт кIанда!
 
Р – гьарф – рагъ хьиз цавара,
Ргаз жеда гатухъди.
Циф акьалтна, авара,
Зайиф жеда зулухъди!
 
С – гьарфуниз – саламат
Хьунухь кIан эллерин.
Сабурлувал, адалат,
Хуш я мехъер-мелерин!
 
Т – гьарфуниз – тамамвал
КIанда гьар са кIвалахда.
Тарсар чириз, авамвал,
Терг ийиз кIанз, алахъда!
 
ТI – гьарфуниз тIа галай
Гаф, чIал кIандач, хиве кьун.
Хуш туш кар хатIа галай,
Гъиле рутут – живе кьун!
 
У-  гьарфуниз – уртахвал
КIанда кардин устIар хьун.
Хуш туш адаз кстахвал,
КIан я вири дустар хьун!
 
Уь – гьарфуниз шад уьмуьр
КIанда, уьзуьр галачир.
Куьлуь-шуьлуь кваз кьамир,
Арадал кар алачир!
 
Ф – гьарфунихъ фу гала,
Артухлама – къафунни.
Фал – берекат тIвар ала,
Фу нез кIандай руфунни!
 
Х – гьарф – кьве пад халидин,
Хатур хуьдай кас я ам.
Хуьруьн, мукьва-кьилидин,
Дуст гьарф хьуниз хас я ам!
 
Хъ – гьарфуниз – хъсанвал
Хуш я, даим ял ягъиз.
КIандач чIуриз инсанвал,
Фидайбур са къвал ягъиз!
 
Хь – гьарф – хьра чаранвай
ЦикIен ятIа, хьар хьтин?
Къах хьиз гатуз кьуранвай,
Гьер ятIа, тум квар хьтин?
 
Ц – гьарфунай – цан цадай
Ухшар къведа куьтендин.
Я дахьайтIа, тIан цадай
Буш къаб ятIа гетIедин?!
 
ЦI – гьарфуниз – цIийивал
КIанда гьар са кIвалахда.
Чаз – цIай, чун цIуз кIанивал,
Мидаим хуьз алахъда!
 
Ч – гьарфуниз чан кIанда,
Лигим хьанвай зегьметда.
Къуват амай кьван чанда,
Ялай касдиз гьуьрметда!
 
ЧI – гьарфуниз гьар чIавуз,
КIанда вичин чIехивал.
ЧIуру кар авурбуруз,
Хас туш кьилин рехивал!
 
Ш – гьарфуник шадвал, хъвер,
Ширинвал ква шуьрбетдин.
Адаз кIанда мел - мехъер,
Межлисар шад суьгьбетдин!
 
Щ – гьарфни – щётка гвай хьиз,
Мугьман хьанва чIалаз чи.
Ящик кьулун шапка хьиз,
Къвалал хьурай алаз чи!
 
Ы – гьарфуни кваз, дуьз лугьун,
Атанвай са мугьман я.
Бязи гафар жез савун,
Ам галачиз пашман я
 
Э – гьарфуни эвер гуз,
РикI хьуурзава зегьметдал!
Темпелбуруз къивер гузва,
Рахазва ам туьгьметдал! 
 
Ю – гьарфуни юрф, кул гваз,
Ша лугьузва юг вегьез.
Харчи-хуруш руг, фул кваз,
Катна физва, кьил элкъвез!
 
Я – гьарф - Яран сувар я,
КIандай яру пайдахар!
Ислягьбур чи цавар я,
Хуш я дустар, уртахар!
 
Алфвитда чи лезги
Ь, Ъ  знак ава.
Тахьун паталди муьскуь,
Чахъ ахъа тир рак ава.
_______
 Гьа и саягъ чи чIалан,
Алфавит – зи мугьман я.
Гьар са азар тир залан,
ТIал сагъардай дарман я!
 
Сажидинан чIаларни,
Куьн патал я аялар!
Тарсар чириз, яларни,
Ягъун хьуй куьн хиялар!