Руьгь шад хьурай ви

Чи литературади вичин зурба кхьирагрикай сад квадарна. ТIвар-ван авай педагог, драматург, хъсан ватанэгьли Мирзали Рустамов яргъал чIугур начагъвиликай 87 яшиндаваз кечмиш хьана. 1929-йисуз Яргунрин хуьре дидедиз хьайи Мирзали Эбилан хва Рустамова хуьруьн юкьван мектеб куьтягьайдалай гуьгъуьниз Къубадин Муаллимрин Институт ва Азербайжандин Гьукуматдин Педагогикадин Институт акьалтIарна пак муаллимвилин пеше къачунай. Саки пудкъад йисаз мукьва и кеспидалди дамахай Мирзали Рустамова жуван халкьдиз, адан културадиз къуллугъ авун, гележег несилриз кьакьан чирвилер гун уьмуьрдин къаст гьисабна.  Ада 50-йисарилай башламишна вичин дуст, кIвалахдин юлдаш, гуьгъуьнай “Лайихлу муаллим” тIварцин иеси хьайи Азиз Гьажиевахъ галаз санал тек са мектебдин ваъ, хуьруьн, райондин културадин мярекатрик къуьн кутуна. Мирзали Рустамован шиирар ва гьикаяяр 1960-йисалай журналрин, газетрин чинриз акъатнай ва кIватIалрик акатнай.  Къелем асул гьисабдай комедиядин жанрда  кардик ктур  драматургдин “Кооператив ашнабазхана”, “Кефербег”, “Рекетирар”, “Етим Эмин”, “СтIал Сулейман” хьтин пьессаяр Дагъустан Республикадин СтIал Сулейманан тIварунихъ галай Лезги муздрамтеатрдин сегьнедал эцигна. Сеняткардин “Кьилиз тефей гастрол”, “Гьа-йиф, алатай йикъар”, “Гьемдуллагьан хам хиялар”, “Санитар”, “ЦIийи завмаг”, “Меккедай хтай гьажи”, “Гьава ахъа жезва”, “Тахсиркар вуж я” пьессайри къениндалди КцIарин Гьукуматдин Лезги Театрдин репертуарда кьетIен чка кьазва. Адан са шумуд пьесса КцIар, Къуба, Хачмаз ва Худат шегьеррин сегьнейра къалурна. Мирзали Рустамова литературадин чIехи ирс тунватIани, сегьнедал эцигай эсеррин кьадардиз килигайла чи драматургияда сифте чкадал алатIани, адан зегьметдиз лайихлу къимет ганвач, са ктабни басма хьанвач. Чавай хьайитIа, хайи културадин, драматургиядин таъсиб чIугвазвай ксарикай сад юкьвал акъатна адан руьгь шадардай и кар кьилиз акъудда. Аллагьди рагьмет авурай.            

“КцIар” газет