Алим ва зари Агьмедов Назир Агъабегович 1910-йисуз Самур округдин Ахцегь хуьре дидедиз хьана. Ада Дербентдин педучилище ва Дагъустандин пединститут куьтягьна, Ахцегьрин ва Магьачкъаладин мектебра муаллим ва директор яз кIвалахна. Гзаф йисара Дагъустандин школайрин илимдин ахтармишунрин институтда къуллугъна: лезги чIалан ва литературадин программаяр, учебникар, хрестоматияр туькIуьрна, милли мектебра дидедин чIал чиру-нин месэлаяр ахтармишна ва методикадин ктабар печатдай акъудна. Педагогикадин илимрин кандидатвилин дережа ва "Дагъустандин лайихлу муаллим" тIвар къазанмишна. Писателвилин рехъ Н.Агьмедова журналиствилелай башламишна: ада хейлин йисара "Дагъустан фукъараси", "ЦIийи дуьнья" ва "Социализмдин пайдах" газетрин редакцийра кIвалахна. Назир Агьмедов са жерге гьикаяйрин ва пьесайрин ("Сифте къван" ва "Цуькверин сувар") автор я. Гьикаяяр "Кьве рикIин хиялар" (1961), "Фаргьад буба рахазва" (1964) ва "Вагьанда къва-нер" (1971) кIватIалра гьатнава. И эсерра авторди ватанпересвилин, дуланажагъ хкажунин ва марифатдин месэлаяр къарагъарнава. Писателди халкьдин мецин эсерар ва Етим Эминан, СтIал Сулейманан, Алибег Фетягьован ирс кIватI хъувуник вичин пай кутуна.
Назир Агьмедов 1970-йисуз Магьачкъалада кечмиш хьана.
Акимов Къ. Х. «Лезги зарияр»
Добавить комментарий