Агакьрай вун бахтунив

«Амукьайди» хьанва  ви тIвар,
Гегьенш дуьня тахьуй ваз  дар!
«Гьеле фад я заз гъуьлуьз физ»-
Вуна жаваб  гуз    илчийриз.
Гьар атайдахъ кутаз синих,
Садаз лугьуз пулун къаних,
Садан къамат я лап къакъан,
Са  масади  -залай  аскIан ,
Садазни  вуч  авач хъсан
Са ярашугъ гьич тахьай кьван.
Тажиб жезва мукьва кьили:
Авачни сад къадай вили ?
Амач   гила ваз чид вяде,
Таярикай  хьанва баде,
Къачу тади, ша фена тур,
Хамир вуна икьван хатур! -
Гьа икI йисар   къвез алатиз,
Уьмуьрдикай кьил   галатиз
Акъвазнава вун   гуьзетиз…
Хабар я заз ви рикIикай
Чинебадик   гузавай цIай…
Якъин   ава хиялра ви
Са муьгьуббат къастар кIеви .
Жагъур  жезвач   а кIаниди
Лугьудайвал –им я зиди!
Мус къведатIа ам куь  кIвализ
Лацу балкIан гвайиди хьиз?
Акатдайвал пIузаррихъ хъвер.
Жедайвал ви ругьда мехъер…
Фад свасвилин а  тахтунив,
Вун агакьун ви бахтунив ,
Мурад я зи амукьай руш,
Кьисметрикай  кумукьай руш!