Хайи манияр...

Хайи мани –халкьдин  мани
Гьикьванни я вун чаз кIани!
Девиррилай  гел  хьиз амай
Лезгивилин кьел  галамай!
Низ чидач вун  «Перизада»?!
Мел-мехъерриз алатна    ван
РикIерик  гьикI  лув кутада:
«Перизада, Перизада,
Перизада гьай гуьзел яр»
Кьурсар  къунвай чи дамарда
Тамир вуна къай гуьзел яр..
Атурай кван «Пейкер баха»
Къалурдайвал  чаз  ярдин  кIвал.
Ихтилатрай вичин  заха
Секинаррай рикIевай тIал:
«Гъваш сумавар чайин чна
Дердер –гъамар пайин чна»…
Эвер  гана гъин «Суна чан»,
Лугьурай чаз  бендер хъсан!
Бес гьинава чи «Шагьсенем»?
Лугьуз  мажал авач къелем,
Цуз ама жал ярдиз  перем?
Фенва ви яр   белки  «Сувал»
Муьшкуьр патан файтунар гуз ?
Мулдин цуьквер туна къавал ,
Ярдин кIвале хьурай лугьуз …
Деринармир  вуна дердер,
Шез амукьда   «Магьи дилбер».
Ягь я устар «Лирик мани»,
Къуй шад хьурай «Мулейлини»,
Икърар чIурай «Алагуьзлуь» ,
Ахъа хьуй ви  гуьгьул куьлуь,
МичIи тахьуй  дуьня экуь !
Хтурай гьам «Лачинан хва»
Буругъдай нафт акъудзавай,
«Зугьре ханум» лугьуз хьурай:
«Я гада» вун нин гада я
Чар кхьидай къелем хьтин?
Ихтилатрай «Ширин –ширин»:
На къизилдин хад твах гада,
ТухузватIа фад твах гада!
«Кьакьан дагълар» мад кьакьан хьуй,
«Билдирханар»  иниз хтуй.
Лугьуз  къулухъ акъвазмир вун:
Паласада  ама «Тайгъун» -
Яхъ  са чуьнгуьр, ягь «Абдуллагь»,
Манидалди саламар лагь !
Акурла куьн вири санал
Шад жедачни Далагь  Билал?
Зани  кхьин мани   квекай
ЦIрадайвал   ругьера къай!