Зи лезги чил

Лезги чилин са пад-Каспий,
Авахьзава Самур вацIни.
Гьарда вичин ийиз кеспи,
Авадан я Лезгистан зи.

Зи Лезгистан - хайи Ватан,
Вахъ девлетар, адни ава,
Гьарда вичихъ ялиз яргъан,
Вахъ къанихбур мадни ава.

Каспий гьуьлни, Самур вацIни,
Жергедава са шумуд дагъ.
Лезги чилин суьрет гуьрчег,
Серес жеда акьурла рагъ.

Зи хайи чил, чIехи чилер,
Кьве пай хьанва къе чун патал.
Денг ийизва халкьдин кьилер,
Чпиз девлет чухун патал.

Шумуд жуьре шагьлар, ханлар -
Нефсер пехъи жанавурар,
Атанай чаз чириз чIалар,
Къармахривди чухваз варар.

Шумудни сад - атай душман -
Шез, хъфенай, яз чеб пашман.
БалкIанрин кIвачик бармакар
Баят хьанай, квахьайла кар...