Абдул Муталибов

Шаир Муталибов Абдул 1906-йисуз Самур округдин Гарагъ хуьре дидедиз хьана. Октябрдин инкъилабдилай гуьгъуьниз адаз кIелдай мумкинвал хьана: Абдула КцIарин муаллимрин техникум, Бакуда Азербажандин гьукуматдин университет куьтягьна. Гзаф йисара Ахцегь ва Докъузпара районрин мектебра ва цIувад йисуз Дербентдин педучилищеда дидедин чIалан ва литературадин тарсар гана. А. Муталибова гьеле мектебда амаз шиирар теснифиз башламишна. Адан эсеррай цIийи уьмуьрдин шикилар, хайи халкьдин ацукьун-къарагъун аквазва. А. Муталибова аялар патални Гзаф эсерар кхьена. Шаирдин шиирар, манияр, поэмаяр ва гьикаяяр цlудалай виниз кIватIалра гьатнава: "Экуьн ярар", "Бахтавар я чун", "РикIин гафар", "ВикIегь Расул", "Гьим хъсан я?", "Гатфар", "Гелер" ва мсб. Абур мектебра ва институтра чирзава. Абдул Муталибова лезги шиират цlийи везинралди ва фикирралди девлетлу авуна. А. Муталибов 1986-йисуз кечмиш хьана, ам Дербентда кучукнава.

Акимов Къ. Х. «Лезги зарияр»