Чи дагъларин жив цIразва,
Алпандин хва.
Чи вацIарин яд кьуразва,
Алпандин хва.
Ватандин чил кьатIнава хьи,
Алпандин хва.
Ви чанда фул гьатнава хьи,
Алпандин хва.
КичIез-кичIез къекъвезва вун.
Къе цIухъ галаз къугъвазва вун.
Жуванбурал элкъвезва вун,
Алпандин хва.
КIан хьуналди чIулав пехъер,
Жедайди туш дагъдин лекьер.
Туькьуьр мийир бахтун эквер,
Алпандин хва.
Зи гафариз яб це хъсан,
Хуьн тавуртIа на ви Ватан,
Алпандин цIу курай ви чан,
Алпандин хва.
(Седакъет Керимовадин «Лезгинкадал илига» кIватIалдай)
Рубрика
Добавить комментарий