Член юлдашрин арада
Мийир на тереф, туьквенчи.
Терг авуртIа а ви къайда,
Квахьда ви кенеф, туьквенчи.
Туьквендин мал къвез рекьемаз,
Шад жемир вун гзаф къемаз,
Дергес гвай юлдаш векьемаз,
На ваз чIугваз кеф, туьквенчи.
Гафар гзаф хъсан къалуз,
Къене — патай ният чIуруз,
Хатур ийиз бязибуруз,
Бес гьам ян инсаф, туьквенчи?
Михьи мал кIаникай кутаз,
Ви дустариз на кьулухъ таз,
Бес инсаф ян гьам куь патаз,
Кьун гьа капратиф, туьквенчи?
СтIал Сулейман я зи тIвар,
Фагьум, фикир авай устIар.
Кесибариз гудай затIар
Жуваз мийир серф, туьквенчи.
Рубрика
Добавить комментарий