Гургьагур

Вуч хабар я, къуншид кIвале кIватI хьана?
Чарахъ-парахъ, гьарай-эвер, гургьагур!
Экуьнахъди яцран гардан кьатI хьана,
Гила физва са-сад гьерер, гургьагур.

Муьруьд лугьуз вичин кьилел жед сирих,
гьар хуьре са яц, гьер тIуьнихъ яз къаних,
Акун хьайтIа хендеда паб – хуш къилих,
Гьерекатда гьатда кIвачер, гургьагур.

Яргъа хуьре кIантIа сад кьий – ирид юрт,
Тух жеч тIуьнкай, на лугьуд я руфун хъурт,
ТIвар ясин26 яз келда гьакIан гьурта-гьурт,
Телкьиндикай27 хьуриз цIилер гургьагур.

Хийир-хейрат хьунал сана вил жеда,
Аш тунвай ленгерида вил жеда,
Рахадайла гьадисрикай28 цIил жеда,
Суьгьбетдани мичIиз вилер гургьагур.

Рухун Али, туш муьридрив мирес вун,
Кьей хва, квахь гьа, гатад абру серес вун,
Дин ислам ваз чидатIа, хьухь иес вун,
Це вуна ви халкьдиз бегьер, гургьагур.