Серминазахъ галаз суьгьбет

- Эхир вуна чIугваз тада зав азар,
Аман, кумир вуна зи ччан, серминаз.
Ви ашкъиди авуна зи рикI бизар,
Вун шем я, зун первана я, Серминаз.

- Ччанди кьарар кьадач вун заз такуна,
Дуьньядилай кIан я вун заз, Невжеван,
Ваз минет хьуй кьамир вуна гъейри яр,
Намус-гъейрат авачни ваз, невжеван?

- Элдин сивера твамир на чи тIварар,
Белки, хъсан хьайитIа кьисмет-кьадар.
Амач заз йикъан кьарар, йифен ахвар,
Вакай жеда ччандиз дарман, Серминаз.

- Гуьзел яр, на куьз чIугвада агьузар,
Вун акваз чи ччанда гьатнава азар.
Лацу хурал битмиш хьай таза анар
Гьар са чIавуз ваз къурбанд я, невжеван.

- Гила бес хьуй, ая вуна са гьуьрмет
Къалур ая на заз ви гьуьсни суьфет.
Ви зилфериз авайди туш гьич къимет,
Аман кумир вуна зи ччан, Серминаз!

- Айиб ая, ви гьуьрмет за хайитIа,
Вун терг-уна маса касдиз фейитIа,
Гужуналди зун бубади гайитIа,
Ахпа ам я эхир-дуван, Невжеван.