Хуьруьг Тагьир

Машгьур шаир Хуьруьг Тагьир (Алимов) Ахцегь райондин Хуьруьгрин хуьре 1893-йисуз дидедиз хьана. Адан буба Алим яшайишдин дар шартIар себеб яз хзанарни галаз Азербайжан патахъ рекье гьатна. Ана, Нуха шегьерда, Тагьира кьве класс куьтягьна. Жегьил гададин буба фад кечмиш хьана, еке хзан адан хиве гьатна. Тагьира гагь са хуьре, гагь масана гьалтай гьар гьи кIвалах хьайитIани ийидай. Шаирдин яратмишунри яхцIурни цIуд йисалай артух девир кьунва. Революциядилай виликан девирда теснифай «Диде», «Буба», «Я кас», «Файдадиз», «Са руша дурнадиз», ва маса шиирра Х. Тагьира инсанар «хиперни жанавурар» хьанвай аям дериндай русвагьзава, зегьметчи халкьдин дерди- баладикай лугьузва, инсафсуз дуньядиз туьгьметзава. ИкI «Диде» шиирда ада тамуз ван хьуй лугьуз, тараз якIв язава: 
Эгер вуна ханачиртIа,
Жедачир зун пашман, диде.
Бахтсуздаказ зун дуьньядиз 
Вучиз хана, душман диде. 
Гьелбетда, шиирда гьалтзавай «душман» лугьудай гаф дидедиз ваъ, гьахъсуз девирдиз талукьди я. Ина шаир къаб алаз рахазва. Амай шииррани ада нифретлу девирдикай халкьдин мецелай суьгьбетзава. Хуьруьг Тагьир 1958-йисуз кечмиш хьана.

Акимов Къ. Х. «Лезги зарияр»