Лезгистан

Зи патав вун инкъилаблин,
Яру эквер гваз атана.
Чирун патал цIийи уьмуьр,
Зи назик гъил кьаз атана.
Гьич садрани заз ван тахьай,
Илим кьиле тваз атана.

Хважамжамдин рангаривди,
Безетмишна къужахар зи.
Шуьрбет цана ацIурна на
Гьич яд такур булахар зи.
Алахъна вун хкажиз мад,
Зи яшайиш,кIвалахар зи.

Вун себеб яз зун уьмуьрдин,
Зи кьисметдин иес хьана.
Хайи халкьдив рахун патал,
Захъ дилавар тир мез хьана.
Гьахъни нагьахъ алцумзавай
РикIикай зи терез хьана.

Азиз дагълар,зи Лезгистан,
Вунни хайи диде я заз.
Ви тIвар кьаз за хкажда кьил,
Къадир-гьуьрмет вине я заз.
Вавай къачуз илгам михьи,
Мани кхьин пеше я заз.