Ишехь, Къемер, чуьнгуьрд симер

Акьала вил – акIана рагъ,
Алатна зи жегьил тир чагъ;
Фена чина авай шафагъ.
Ишехь, Къемер, чуьнгуьрд симер.

Япалухдин къармахда нуькI
Гьатна, гила гьал хьурай гьикI?
Аман, зи рикI я хьи гъарикI!
Ишехь, Къемер, чуьнгуьрд симер.

Хьанва гила эхир-пехир,
Югъ я няни: тIая нехир?!
Шихмурадаз я вун чехир.
Ишехь, Къемер, чуьнгуьрд симер.

Хьанач ваз бахт и дуьнеда,
Сад – балкIандал, сад – пияда.
Ви цуьл амач хьи таяда,
Ишехь, Къемер, чуьнгуьрд симер.

Аюх яни, им са ахвар, -
Гъавурда тур зун, чан вахар.
Вили кIвадриз рикIин накъвар,
Ишехь, Къемер, чуьнгуьрд симер.