ЧIилихъ Абдулгьамид 1873-йисуз Куьре округдин (гилан СтIал Сулейманан тIварунихъ галай район) ЧIилихъ хуьре кесиб лежбер Демиран хизанда хана. Агъур уьмьурди гьелекнавай Демир вахтсуз кечмиш хьана ва адан юлдаш Хатус са шумудра гъуьлуьз хъфиниз мажбур хьана. Етим хьайи Абдулгьамид, идаз- адаз кIвалах ийиз, патал хуьрера, гъурбатра къекъвена. Амма кьисметди адаз Кьеан Агъамирзе-эфендидивай, гьакI Штулрин медресада ва гуьгъуьнилайни Алкьвадар Гьасанавай тарсар къачудай мумкинвал гана. Абдулгьамида вичин шиирра яшайишда, уьмьурда гьалтзавай зидвилер, къабарар дуьздал акъудзава, ада алчахриз лянет гузва, кесибрин пад кьазва, абур Аллагьдини, фекьйрини чиновникри кузвайди къалурзава («Куьмек це», «Фекьяр», «Залум дуьнья», «Авайди са гъам я, дуст», «Дустуниз» ва мсб.). ЧIилихъ Абдулгьамидан лирикадин шиирар иллаки гуьзелбур я. Абура шаирдин вахтунин гьава ава. Агъадихъ чна абурукай са шумуд гузва. Винидихъ тIварар кьур шиирар Дагъустандин литературадин хрестоматияда (1989-йис) чапнава. ЧIилихъ Абдулгьамидан чIалар кIватI хъувунин карда вичиз араб чIал хъсандиз чидай Мегьамед Садикьа зегьмет чIугуна. Адан ва маса юлдашрин алахъунар себеб яз, чи гъиле алай вахтунда Абдулгьамидан хейлин шиирар гьатнава.
Акимов Къ. Х. «Лезги зарияр»
Добавить комментарий