“Аламди” къадим шегьерда поэзиядин зурба нян кьиле тухвана

Алай йисан 26-сентябрдиз Дербентдавай СтIал Сулейманан тIварунихъ галай Лезги Муздрам Театрдин дараматда "Алам" журналдин гъиликдарвилик кваз поэзиядинни музыкадин нян кьиле фена.
Иштиракчийрикай сада лагьайвал, "Марвар сувар" вижевайди, туькIвейди хьана. Иниз "Азербайжан-Дагъустан" дуствилин жемиятдин кьил Абдулкъафар Агьмедов, тIвар-ван авай композитор Мегьамед Гьуьсейнов, албанист-алим Ярали Яралиев, шира чIугвар Дарвин Велибегов, Дербентдин мериядин завотдел Гуьлпери Рамазанова ва маса ксар мугьман яз атанвай.
Межлис тухузвайбур "Алам" журналдин кьилин редактор Камран Аламвини "Марвар" литкIватIалдин кьил Эйваз Гуьлалийрин тир.

Сифте гаф къачуна рахай Абдулкъафар Агьмедова Дагъустандинни Азербайжандин халкьарин арадавай галкIайрикай, стхавиликай гегьенш малумат гана.
Ахпа Хачмаз райондай атанвай шаир-муаллим Вакъиф Муьшкуьрви рахана. Ада "Москвадин лезгияр" тешкилатдин гъиликдар Мегьамед Эминова ракъурнавай тебрикдин чар, гуьгъуьнай вичин "Пелазгияр" тIвар алай шиир кIелна.
КIеле шегьердин векил, шаир Зерифа Кьасумовадин шиирар яб акалзавайбуру хушдаказ кьабулна.
Волгоград шегьерда уьмуьрзавай чи ватанэгьли Гьилал Аскерова кIелай шиирди авур таъсир геждалди рикIел аламукьдайди хьана. Римма Гьажимурадовади романтик стилда кхьенвай шиирар залда авайбурун лап рикIяй хьана. Гуьгъуналлаз Бести Нифтиевади Асеф Мегьманан, Келентер Келентерлидин, Эйваз Марваран вичи урусдал элкъуьрнавай шиирар кIелна.
Лезги поэзиядин рехи шаиррикай тир Сажидин Саидгьасанова (Агъа СтIал) кIелай шиирар бегьем кьеж квайбур тир. Ам кIватI хьанвайбуру сегьнедай капаралди рекье туна.
Шаир-трибун Эйваза межлис кьиляй-кьилиз шиирар лугьуз-лугьуз кьиле тухвана.
Межлисдал Кьибле Дагъустанда уьмуьрзавай жегьил шаирризни гаф гана. Абурун тIварар квезни чир хьайитIа хъсан жеда: Марсел Ризаев, Владик Батманов, Сулейман Ахцегьви, Мадина Рамазанова, Дилмира Ашурбекова, Саира Сефибегова, Гуьлфия Пиругъланова, Зарина Мустафаева.
Жегьилри чпин Дербент шегьердин са гьафте вилик, 19-сентябрдиз кьиле фейи 2000 йисан юбилейдиз талукьарнавай шиирар кIелна. Лезги поэзиядал ашукь кас, бинедай вурвуви тир Мегьман Саруханова са азим шиирар хуралай лагьана. Манидарар тир Фаризат Зейналовади, Ашукь Шемшира, Магьире Шириновади, Руслан Пирвердиева мярекат чпин манийралди чIагурна. Межлис, иштиракчийри санал шикил ягъуналди кьилиз акъатна.

Вакъиф Гьажиагъаев
"Кцlар" газет