Лезги чIал кIанарзава

Са шумуд йис инлай вилик Дагъустандин Гьукуматдин Универ­ситетдин Бакудин филиалдин Дагъус­тандин филологиядин факультет агалкьунралди акьалтIарна Къебеле райондин ЦIийи Дызахлы хуьруьн мектебда лезги чIалан муаллимвиле кIвалахал акъвазай Айтекин Бабаева хайи чIалални эдебиятдал рикI алай инсанриз хъсандиз чида. Ада аялриз лезги чIал кIанарун патал кIвенкIвечи тежрибадикайни цIийи методрикай гегьеншдиз менфят къачузва. Муаллимди чи тIвар-ван авай зарийрин юбилеяр къейд ийидай мярекатар тухузва, аялриз абурун шиирар хуралай чириз куьмек гузва. Ада гьакIни «Самур» газет рикI алаз теблигъзава.
Умун къилихрин, хъуьтуьл гьиссерин инсан тир, хайи халкьдални хайи Ватандал гзаф рикI алай Айтекинахъ заривилин алакьунарни ава. Ада гьам азербайжан, гьамни лезги чIаларал шиирар теснифзава. Агъадихъ чна адан са шумуд шиир чапзава. 

Зулун пеш хьиз…

Зулун пеш хьиз рикI юзазва,
Ада завай икI жузазва:
И дуьньядал виридалай
Вуч верцIи я, вуч я масан?
За адаз икI жаваб гузва:
Авани, лагь, са затI хъсан,
Хайи чIал кьван багьа, масан ?

Зулун пеш хьиз рикI юзазва,
Ада завай икI жузазва:
Лагь кван вуна, и дуьньяда
Вуж я рикIиз чимид икьван?
За дамахдив икI лугьузва:
– Заз хайи чIал кIанарнавай,
КуькIуьрнавай рикIе и цIай,
Акунач гьич маса инсан,
Диде кьван заз авур рикI-чан.

Зулун пеш хьиз рикI юзазва,
Ада гила икI лугьузва: 
КIан тахьайта веледдиз чIал,
Дидед чIалан гьикI хьурай гьал?
И зи гафар на рикIел хуьх,
Дидед чIалаз вун арха хьухь.
Гьич сакIани чара тежер
ТIал тирди, заз чир хьана вун.

Aхгуда зун

ТIаларикай кхьиз кIандач,
ТIаларивай къакъуда зун.
Залан парар эхиз кIандач,
Парарилай алуда зун.

Заз руьгь гайи зи хайи чIал,
На кукIушриз акъуда зун.
Эгер ви тIвар хуьз тахьайтIа
А кукIушрай авуда зун.

Гъуцар хуьзвай вили цавар,
Гьинва халкьдин бахтлу чIавар?
Чи тарихриз гузва тIвалар,
Дегь чIаварив ахгуда зун… 

Куьз я ?

Дуьнья, куьз я ви акунар,
АвачтIа къе дуьз кьатIунар?
Зи хиялрик кумач пунар,
ХупI аламат сир хьана вун.

Мелъуьнди хьиз чиниз хъуьрез,
Гапур ягъиз кар кьур хирез,
Куьз инсанрин рикIер регъвез,
ЦIуру регъуьн кIир хьана вун.

Яргъаз ракъуз хиял, гиман,
Залум я вун вучиз икьван?
Садбуруз икI шелни-шуван,
Бязибуруз пIир хьана вун.

Са чин кьуру, са чин кьежей,
Чидач хьи ваз мийир, межер.
Гьич сакIани чара тежер
ТIал тирди, заз чир хьана вун.

"Самур" газет