Лале Садирова

Лале Садирова Энибаладин руш 1991-йисан февральдин 25-даз КцIара дидедиз хьана. КцIар шегьердавай 2-нумрадин юкьван мектеб акьалтIарай и стIурви руша Бакудин Славян Университетдин журналистика факултетда чирвилер къачуна. Са жегьил журналист хьиз Бакуда «Новое Время», «Неделя», «Qusar-КцIар» газетра кIвалахна. И викIегь рушан дидедин чIалал гзаф рикI ала, иер-иер шиирар кхьизва. Адаз са иер дуру чешмеда ргазвай руьгь, хъсан кьатIунар, фагьум авайвиляй цIарарихъ дагъларин кьилихни ватандин кукупIдин атир гала. Лаледикай хъсан шаир жедайдал чIалахъ я зун. Гьавиляй «АЛАМ»да адан шиирар гун къарардиз атана. Ваз чIехи агалкьунар хьурай, Лале!

Эйваз МАРВАР

Дуьня

Ни гана, ни къачуна вун?
Кьуд-пад тапар дуьня.
Ваз «хъсан» за гьикI лугьун?
ИчIи гафар-чIалар, дуьня.

Зун, Лезги я!

ЧIал-диде я, виридалайни ширин я,
Хайи чилел и зи руьгьни секин я.

Бубайрин тIвар кьадай датIана вине,
Зун Лезги я, лезги иви авай къене!

Имкан це!

ЧIалах туш зун гафарал, вири тапар я,
Квез кичIе жемир тамашиз зи вилериз.
Тапаррикай мекьи я, чандани - къаяр я,
Имкан це заз, гьахъ хкиз чи эллериз!

Къе цав лал я

Къе цав лал я, гьич са гафни рахан тийиз, 
Варзни акъвазнава гьакI фикирди кьуна. 
МичIи тавар катна зи вилерикай и йифиз, 
Абуру зун дерин са хиялда туна…

Вахтар алатна

Хиялар яргъариз акъатна,
Ахварай чун геж аватна,
Виридаз акьвазна акур,
Алатна, вахтар, алатна…

Гьар патахъ алахьмир

Ван татурай куь япариз, вилериз такурди,
Авайвал рахух датIана, лагь жуваз акурди.
Са низ ятIани зиян гуз, садрани алахъмир,
Кьил кумачир вацI хьиз, гьар патахъ алахьмир.

Булахдал заз яр акуна

Хуьруьн булахдал заз зи яр акуна,
Акъвазнавай ам квар къуьнел алаз.
Пеле чIур, пIузаррихъ хъвер кутуна,
Мадни катна, жейран, кIанидаз гуз наз.

Амукьна са хиял хьиз

Гьар марф атайла хкведа вун рикIел,
РикIи ягъазва, чила акьазвай стIал хьиз.
Сефил я зун, вилерални зи ала шел,
Вахтар физва, амукьна вун са хиял хьиз...

Зул къвезавай

Заз кисна акъвазнавай са тар акуна,
Ам авахьзавай пешерик шезавай.

ТIебиатди къизил рангинин пекер алукьна,
Адаз мугьман зул къвезавай.

Хъфена

Хъфена… Цав аватна агъуз,
Булутар къаварал ацукьна.
Ван хквезмач, кан ятIани яб хгуз,
Ви геллер яргъара амукьна.

Яраб пака рагъ жедатIа?

Вуч яргъи я и зулун йиф, 
Ачух уьхънен мус къведатIа?
Гум хьиз чкIанва кьуд-патаз циф,
Къе мекьи я, яраб пака рагъ жедатIа?

Зи рикI дар я...

Зи рикI вучиз ятани дар я къе.
Аман гузвач хиялри заз,
Кьиле дерин са тIал таз.
Къецел алайди рагъ ваъ, хар я къе,
Зи рикI вучиз ятани дар я къе.

Лацу цуьквер

Къвазмир акьван перишан, кьил агъузна,
Пешерик чуьнуьх хьана, лацу цуьквер.
Къе марфади куь пешер юзурна, авудна,
КуьцIуьрна гьакIни вилик квай рекъер.

Гатфар

Ахъа жезвай цуьквер къурайла, 
Марфадин стIал чиле акьайла, 
МичIи йифериз ахвар атIайла, 
Мадни на сефил туна хьи зун, гатфар?!