Мегьамед Мегьманов

Саваб

Вучиз вун зал дуьшуьш хьанай а юкъуз,
РикIиз хуш тир мили, ширин хиял хьиз.
Хъфена вун, ви гьижранди куз-хъкъуз,
Алама зун диде квахьай аял хьиз.

Яргъалай вун хъуьрезва заз датIана,
ЗверайтIани ви дидардив агакьдач.
Я инсафсуз, зани гила кьатIана,
Вун хиялдай акъудизни алакьдач.

Зи каниди, ша вун икьван геж жемир,
Къизилгуьлдихъ билбилдин рикI кабаб я.
И дуьнядал садра ганва чаз уьмуьр,
Хушдиз девран гьалун чIехи саваб я.

24.11.1991     
Ширвановка

Къизилгуьл

За вун ганай кани ярдиз, канда лугьуз къизилгуьл,
Ганачир хьи, хьурай лугьуз цIакулдилай кьезил гуьл.
Гьатна гъиле, ви цацарин къадир течир ксарин,
Вучиз хел-пут алатна вун хьанай икьван кьецIил гуьл?!

Жедач

Муьгьуьббатди кутур ялав,
ВацIаривай туьхъуьр жедач.
Са фасадди чIурай кIвалах,
Агъзурдавай туькIуьр жедач.
 
Кьегьал

Кьегьал ам туш, дагъ чилелай юзуррай,
Кьегьал ам я, вичи дагълар гьазуррай.

Михьивал

Михьи ятIа эгер ви рикI,
Са чIавузни жеч вун гъарикI.
ТIекьуьл рикIин ният мичIи,
Вил ичIи жед, акьул пичи.

Гъед

Вичин ватан тир гьуьлуьвай,
Са кам яргъаз акъатай гъед,
Гьич стIални яд кумачиз,
Къумад винел къупкъуру жед.

Самур вацI

Дагъдин ятар кIватIна санал цIилих хьиз,
Тик синерай авахьда вун Самур вацI.
Иви юргар са жегьилдин къилих хьиз,
Бязи чIавуз алахьда вун Самур вацI.

Гагь и патахъ, гагь а патахъ гелягъ жез,
Тунва вуна тик кьваларал шумуд кьацI.
Гагь хкаж жез, гагь къванерал элягъ жез,
Рехъ жагъуриз алахъда вун, Самур вацI.

Йигинвилив дагъларивай къакъатиз,
Ашкъидалди Каспи гьуьлуьв агатиз,
Дагъ ахкурла гьул рикIелай алатиз,
Лап явашдиз авахьда вун, Самур вацI.
  
Канибур

Гатун йиф я, экуь я чил нек экъичай хьиз,
Вацра цавуз акъуднава гъетерин суьруь,
ЧIигъичIигъар секин хьанва яд иличай хьиз,
Хуьруьн къене ван-сес амач, ксанва вири.

Тек кьве рикIиз динжвал амач, муьгьуббатди куз,
Таран кIаник акъвазнава явашдиз рахаз.
Пешерин хъен къекъвезава рушаз темен гуз,
Руша вацраз килигзава, гадади рушаз.

Кьвед сасадаз килигайла къекъифиз хъуьхъвер,
Югъ жедалди «азаб» чIугуз гьазур я абур.
Кьведа санал атIун патал уьмуьрдин рекьер,
Муьгьуьббатдин имтигьанда ийизва сабур.

Ахъа жезвай къизилгуьлдин таза кIурукI хьиз,
Рушан чина куькIуьннава ашкъидин нурар.
Гележегдин бахтлу йикъар вилерикай физ,
Ирид цавуз акъатзава хиялрин гурар.

Суракьдава зун

Ватан зид, чилер зид, душмандив майдан,
Къе жуван майдандин суракьдава зун.
Душманди зи чилел эцегна лишан,
Къе жуван лишандин суракьдава зун.

РикI чIехи, дерт чIехи, хирерни залан,
Сир вуч я, ягъийри чун авур талан?
Душманар-эцегда чи юкьвал палан,
Куквардай рухвайрин суракьдава зун.

Ажузвал хиве кьаз тахьуй, эй жаван,
Кьегьалвал квадармир, са кIусни жуван.
Сифтегьан ажузвал кваз такъаз акьван,
Умудквай инсанрин суракьдава зун.

Журнал "АЛАМ"