Пешедиз вафалу хьайиди

Сулейман-Стальский райондин ДаркIуш-Къазмайрилай тир Саидин Кичибегов 1967-йисуз хуьруьн библиотекадин заведующийвиле кIвалахал кьабулна, 2010-йисуз кIвалахдилай элячIна. Хуьруьн библиотека арадал гъайиди, анаг районда культурадин хъсан маканрикай садаз элкъуьрайди С.Кичибегов я лагьайтIа, зун ягъалмиш жедач. Саидин Кичибеговахъ галаз таниш хьайи сифте югъни зи рикIел хъсандиз алама. 1990-йисан февралдин вацра зун райондин “Коммунизмдин гатфар” (гилан “Куьредин хабарар”) газетдин корреспондентвиле кьабулнай. Сифтегьан командировкадиз ДаркIуш-Къазмайрал ракъурдайла, газетдин редактор Сейфудин Муталибова заз лагьанай: “ДаркIушрин хуьре ваз чирхчир авачтIа, библиотекадин заведующий Саидин Кичибегован патав алад, ада ваз герек делилар жагъуриз куьмек гуда”. Гьа сифте таниш хьайила, зун инанмиш хьана хьи, С.Кичибегов неинки бажарагълу культработник, гьакI ширин мез авай, мугьманперес, хуьруьхъ, жемятдихъ рикI кузвай, къени къилихрин инсанни я. Гуьгъуьнлай чун халис дустар хьана. Саидин Кичибеговаз хуьруьн тарихни хъсандиз чида. Ада ДаркIушрин хуьруькай, гьакIни машгьур хуьруьнвияр тир, 1885-йисуз дидедиз хьайи, Стамбулда кIелна, инженер хьайи Гьажи Къарахановакай, Каспий гьуьляй нафт хкудун патал сифте проектар гьазурай, академиквилин тIвар къачур Иметхан Шабановакай, лектор-международник Эседин Эминовакай, Азербайжандин Игитвилин тIварцIиз лайихлу хьайи летчик - истребитель Сергей Муртазалиевакай, РФ-дин лайихлу ва РД-дин халкьдин артист Абдулкъадир Сайдумовакай, архитектор, академик Атлухан Керимовакай делилар кIватIна. Абур аваз библиотекада акъудай “Чи хуьр агьваллу хьунин еришар”, “Хуьруьн машгьур инсанар” стендри къени аниз къвезвайбурун фикир желбзава. С.Кичибегова хуьруьн юкьвал алай, 4-5 гектардин майдан кьунвай, 500-600 йис хьанвай тарар авай “ПIирен тамукайни” фикир желбдай, таъсирлу ихтилатар ийида. Ам, вичи лугьузвайвал, “пул авачир мешебеги яз”, къадим тамухъни гелкъвезва. Яшар хьанватIани, гьамиша къайгъуйрин яцIа аваз вердиш С.Кичибегова хуьре къени баркаллу гзаф крарик кьил кутазва. Хуьруьнвияр дагъдин хуьруьз куьч хъхьунин теклиф гайибурукай сад Саидин я. Къе куьгьне хуьре саки 15 касди, гьабурукай яз С.Кичибегова вичини кIвалер эхцигнава. 1987-йисалай Дагъустан Республикадин культурадин лайихлу работник тир С.Кичибегова хуьруьн библиотекадин ва Культурадин кIвалин работникриз исятдани кIвалахда куьмекар гузва, меслятар къалурзава.

Хазран Кьасумов
Лезги газет