Бакуда лезги културадин журнал тир "Алам" акъатиз са йисалай алатнава. Сифте тилитдилай журналди вичин камар уьткем, шах тирди, вич дуьшуьшдинди туширди чириз алахъна. Чи меркезда поэзиядинни манидин мярекатар тешкилун, манидаррин конкурсар кьиле тухвана "Лира" премияр гун, "Марвар" эдебиятдин межлис туькIуьрун и журналдин къени крар я. ЦIийи йисуз "Алам", кIелзавайбурун вилик кьве цIийи улубдив акъатна: "Чинеба гаф" ва "Лезги поэзиядин антология”.
Муаллим-шаир Вакъиф Муьшкуьрвиди туькIуьрнавай "Лезги поэзиядин антология" чара-чара авторрин хкягънавай эсеррин кIватIал я. Ина VII вишйисан юкьвара уьмуьрнавай Гуьлгер таваталай кьил кутуна къе цIийиз камар вегьизвай жегьил шаир Владик Батмановал кьван пудкъанни кIуьд шаирдин эсерар, гьакIни чи халкьдин дегьвилинни кьегьалвилин эпос тир "Шарвилидикай” чукIвар гьатнава. Авторди улуб туькIуьрдамаз "Самур" газетдикай, "Чирагъ", "Алам" журналрикай, "Дагъустандин литература", "Революциядилай виликан лезги литература" улубрикай менфят къачунвайди къейднава.
Сифте яз малумат гайи чи халкьдин IХ-Х виш йисара уьмуьрнавай Абу Тагьир Нихавидин шиирра араб-перс таъсир аквазватIа, ХII виш йисара уьмуьрнавай Зейнаб Хиневидин "Чангу гъваш зи" шиирда, рубаийрилай тафават яз чIалан михьивили хъверзава: Чангу гъваш зи, шиирдайвал, Зунни вун хьиз, шезва лугьун. Вахъ вил галай хиялри зи, РикI кукра хьиз незва лугьун. Чангу гъваш зи, сирим-сирим, Ван кутан за адахъ ирим. АтайтIа зи кани КIирим, Къеневай рикI тIазва лугьун. Чи мектебдин лезги чIалан муалимди и шиир заз улуб къачур пака юкъуз хуралай лагьанатIа, има бес кIватIалдин автордин чи чIалаз хидмет тушни? Лезги кхьирагрин эсерар азербайжан чIалаз элкъуьрнавайдини кирам вич я. И карди азербайжанвийризни, гьакIни хайи чIалал кIел-кхьин течизвай лезгийризни чи эдебиятдикай са кьадар чирвилер къачудай мумкинвал гузва. Литературадин эсер, иллагь хьи, шиир маса чIалаз элкъурун четин кар я. Ада таржумачидивай чIехи зегьмет, кьве чIални пара хъсан чир хьун, сабурлувал тIалабзава. Шиирдин кIалуб, милли руьгь, фикир, цIарарин къене пай хьунар хуьн, автордин гьиссерив, кьатIунрив игьтиятлувилелди эгечIун элкъуьрзавайдан хиве гьатзава. Вакъиф муалимдиз и кIвалахдин заланваликай кичIе тахьана руьгьдин тIалабун хьиз, чIехи ашкъидив ихьтин зурба кардик кьил кутуна, вягьтедай къвез алахънава. Улубда татугайвилер, зайиф элкъуьрунарни авачиз туш. Ана чи са кьадар сейли шаирарни гьатнавач. Гьавиляй кIелзавайбуру чпин фикирар автордив агакьарайтIа, лап хъсан жедай. Зун Вакъиф муалимди нормал критика пара хушдаказ кьабулна, куь фикирар цIийи кIватIалда кваз кьунал чIалахъ я. Амма, улубдин чи чIал, чи халкь, кIелзавайбур патал хийир паради я. Завай хьайита, адан гереклувал, агакь тийизвай патарилай пара кьакьанда ава.
Эйваз Гуьлалиев шаир-муалим
"Кцlар" газет
Добавить комментарий