Бакуда и тIвар алаз лезги эдебиятдал рикI алайбурун дернег тешкил хьана.
Малум тирвал алатай йисалай чи меркезда "Алам" тIвар алай лезги културадин журнал акъатзава. Чи култура вилик тухунин рекье вичин сифте камар вегьизвай журналдин кьилив "Марвар" лезги литаратурадин кIватIални кардик акатна.
2-мартиниз Бакуда "UFUQ-S"дин дараматда кьиле фейи сад лагьай кIватIалда шаир ва журналистар Вакъиф Муьшкуьрвиди, Жалал Жалалова, Римма Гьажимурадовади, Абир ЭчIехвиди, Руслан Шейдаева, Зиядхан Мурадханова, Билал Адилова, Къурбаналийрин Камрана, Эйваз Гуьлалиева, Анар Уьнуьгъвиди, Орхан Мирзалиева, Бести Нифтиевади ва Элтудоди иштиракна.
КIваталдал рахай "UFUQ-S" ММС-дин директор Ван Дер Спуж Ролеоф Жагьаннеса чпин кIвалахдикай куьруь малумат гана, “Марвардиз” агалкьунар мурадна, чпи акъуднавай “Зи чIалан улубни” коллективдиз пешкешна.
КIватIалдин межлис "Алам" журналдин кьилин редактор Камран Аламвиди ахъайна, атанвай инсанар са-садахъ галаз танишарна, журналдин кIвалахдикай, арадал гъизвай дернегдин вилик акъвазнавай везифайрикай малумат гана. Атанвайбурувай цIийи теклифар суракь авурдалай гуьгъуьниз ада цIийи йисан планрикай рахана. Гьа икI журналди вичин цIийи премия тир “Лира” туькIуьрнава.
И премия виридалай хъсан нетижаяр гъиликнавай културадин кIвалахдардиз гурвал я. Кьилин редакторди "Марвар" эдебиятдин кIватIалдиз чIехивал авуниз шаир Эйваз Гуьлалиев теклиф гана. Теклиф сесинал эцигуналди кьабул хьана.
“Марвардин” кьвед лагьай пай Эйваз Гуьлалиева кьиле тухвана. Ада кIватI хьанвайбуруз разивал, “Марвардизни”, “Аламдиз” агалкьунар мурадна.
Чи къенин эдебиятдикай, кьилди лезги поэзиядикай и жергейриз цIийиз къвезвай жегьилрикай, шиир туькIуьрунин кьетIенвилерикай малуматар гана, къведай сеферда гьарада вичин яратмишунрин чешнеярни гваз атун теклифна.
КIватIалдин пуд лагьай пай чун жегьилар патал лап марагълуди хьанай. Шаир Вакъиф Муьшкуьрвиди, Эйваз Гуьлалиева чипин, Руслан Шейдаева Къудрат Велиханован, Къурбаналийрин Камрана Келентер Келентерлидин, Вакъиф Муьшкуьрвиди вичин лезги чIалай Азербайжан чIалаз элкъуьрнавай чи гзаф зарийрин шиирар кIелна.
Шаир Вакъиф Муьшкуьрвидин проектдикай-лезги шаиррин чIалар Азербайжандал элкъуьруникай иштиракзавайбуру чпин фикирар лагьана, кьилди им пара важиблу кар тирди къейдна, Азербайжанви кIелдайбуруз лезги эдебият чирун патал чIехи антонология гьазурзавай Вакъиф муаллимдиз агалкьунар мурадна.
Пуд сят чIугур “Марвардин” сад лагьай кIватал хъсан шартIара кьиле фена, са-садахъ къарих тир иштиракчийри вахт мус акъатнатIани байихнач.
Эхирдай сад лагьай межлисдин иштиракчийри санал шикил чIугваз туна.
КIелзавайбуруз малумат гун хьи, "Марвардин" межлисар гьар вацран сад лагьай кишдин юкъуз кIватI жеда. КIандай гьар садаз адан вар ахъа я. Муштулух гун гъвечIи чIавалай пара кIандай заз и хуш хабар "кцIарвийрив” агакьарун рикIивай хьана.
Анар УЬНУЬГЪВИ
Кцlар газет
Добавить комментарий