Рагъ мукьув гъиз кIан хьана заз...

Сифте яз гъиле къелем кьуна шиирар теснифайла адан пудкъанни цIуд яшар тир. Дуьньядин туькьуьлвилерни верцIивилер акур, гзаф яцIарай акъа-тай агъсакъал шиир кхьиз дердери мажбурнай. Москвадин Международ-ный Алакъайрин Институт чешнелудаказ акьалтIарай, гзаф йисара ООН-дин жавабдар къуллугърал хьайи адан хва Русланан уьмуьр 1966-йисуз кьатI хьайила сабур квахьай бубади къелемдикай вичиз дуст кьунай. Алимурад СтIурвидин шиирар мецерай - мецериз фенай.
2006-йисуз чапдай акъатай адан "Пудкъанни цIуд йисуз рахун тавур къелем" тIвар ганвай ктабни кIелзавайбуру хушдаказ кьабулнай. Ктабда шаирди азербайжан ва лезги чIаларал кхьенвай шиирар гьатнава.
Алимурад Бубадин хва Шагьму-радов (Алимурад СтIурви) 1933-йисуз КцIар райондин СтIур хуьре дидедиз хьана. Ина мектеб куьтягьна Къубадин Муаллимрин Институтда кIелай ада хайи хуьре муаллимвал авунай. Гуьгъуьнлай Азербайжандин Гьу-куматдин Политехнический Институт заочныдаказ акьалтIарай Алимурад къени къилихрин, хайи халкьдихъни хайи чIалахъ ялдай инсан тир. Са шумуд йис инлай вилик дуьнья дегишарай Алимурад СтIурвидин шиирар къени мецера ава. Им акI лагьай чIал я хьи, шаир кьенвач, поэзиядал рикI алайбурун рикIера яшамиш жезва.
Агъадихъ чна шаирдин ктабдай кьуд шиир гузва.

                           АЛАКЬНАЧ

Мурадривди агакьайла жаванар
Югъ куьруь йиз кIан хьана заз, алакьнач,
Жанавурни хеб са-садав туькIуьрна,
Кьвед санал хуьз кIан хьана заз, алакьнач.

Дуьньяд нямет виридаз пай авуна,
Ажуз, къудуз сад-садаз тай авуна,
Етим авай кумада цIай авуна,
Рагъ мукьув гъиз кIан хьана заз, алакьнач.

Вучиз хьана и гишинбур, яванар?
Сад Аллагьдив авуна за дуванар.
Дуьнья туна суруз физвай жаванар,
Рекьинкай хуьз кIан хьана заз, алакьнач.

Вучиз дуьнья икI са-садак какахьна,
Етимарин дердер-гъамар алахьна.
Агакьнавай къуьлуьн никIер акахьна,
Вахтунда гуьз кIан хьана заз, алакьнач.

Кьакьан дагъдиз тамашзавай тепедиз,
Куьлгедик квай гардан шуькIуь цуькведиз,
Вичелай фад бала кьейи дидедиз,
Шиир кхьиз кIан хьана заз, алакьнач.

            ВУЧИЗ Я?

Кьисметар гай кьуьзуь фелек,
Ви дердер залан вучиз я?
Са дидеди нек гана хвей
Стхаяр душман вучиз я?

Гьар четинвал эхи авур,
Веледар хуьз чIехи авур,
ЧIулав чIарар рехи авур,
Дидеяр пашман вучиз я?

Сад багьа я, сад я пулсуз,
Сад къиметлу, сад я ужуз,
Сад зайиф я, сад я къудуз,
Къудуздаз майдан вучиз я?

Уьмуьр куьруь са гагь ятIа,
Гьахъсузвалун гунагь ятIа,
Вун кьведазни Аллагь ятIа,
Сад нуькер, сад хан вучиз я?

Чаз гай паяр масан гана,
Бязибуруз хъсан гана,
На дуьньядиз инсан гана,
Иблисни шейтIан вучиз я?

Дерт кесибда эхиз хьайла,
Сад гужлу, къад ажуз хьайла,
Стхад стха рекьиз хьайла,
Дуьньяда инсан вучиз я?

Дердер еке, мурад гъвечIи,
Хизан пара, суфра ичIи,
Акьуллудаз дуьнья мичIи,
Ахмакьдаз девран вучиз я?

Намуссузди къудузарна,
Диде-буба ужузарна,
Кьуьзуь кьиляй ажузарна,
Ажал къвердал тан вучиз я?

            ДУЬНЬЯ

За ви дердер низ ахъайин,
Цуькведивди дигай дуьнья,
Ашкъиди кай Керемакай
Эслидиз пай тагай дуьнья?

Пашман я ви билбилдин ван,
Етимдин фу гьамиша яван,
Фагьум тийиз жегьил, жаван,
ЧIулав суруз ракъай дуьнья.

Яс туькIуьрна мехъер гъенел,
Велед гана дидед гъилел,
Балад магьфе бубад къуьнел,
Жегьилзамаз ягъай дуьнья.

Эвел шадвал, эхир женжел,
Гъиле теспягь, кьула хенжел,
Диде туна гъенин куьнжел,
КIвал сусарив вугай дуьнья.

Вун дуст яни, душман яни?
Къудузбуруз майдан яни,
Иблис яни, шейтIан яни,
Жагъур жедач ваз тай дуьнья!

        ЗАЗ ЦЕ, РУСЛАН

Къарибда ви сурун патав
Заз са чка таз це, Руслан.
Ви пекер заз дуьз къведай тир,
Куьгьне кафан заз це, Руслан.

Чуьллер буш я, гуьл тахьайтIа,
Цуькведал билбил тахьайтIа,
МичIи сура гъил тахьайтIа,
Бубадив пел къаз це, Руслан.

Къелем хьайтIан рукар, тамар,
Кхьиз жеч зи дердер-гъамар,
Ваз авай тир цуьквед тумар,
Сура цуьквер цаз це, Руслан.

Ви дидардик гала зи вил,
Сур яргъава, агакьдач гъил,
Зун кьуьзуь я, диде зелил,
Куьгьне кафан чаз це, Руслан.

Ватанди ваз ша лагьайтIан,
Шиирар къуша лагьайтIан,
Дидед ваз хъша лагьайтIан,
Рази жемир, наз це, Руслан.

Самур газет