Цlийи ктаб

ЦIийи йисан савкьват. Шагьабудин Шабатов, «Лезги газетдин» хсуси корреспондент, шаир, РФ-дин писателрин ва журналистрин Союзрин, ЛПС-дин комитетдин член, Дагъустандин культурадин лайихлу работник тир адан тIвар, ам вич тийижирбур Кьиблепатан Дагъустанда белки бажагьат жагъида.

Алай аямдин лезги поэзияда вичин гаф лугьуз, вичин гелни таз алахънавай адан гъиликай шииррин, гьакIни прозадин са шумуд кIватIал хкатнава. Абур халкьди хушвилелди кьубулни авуна, хейлин шиирриз чи композиторри ва гьевескар манидарри манийрин авазарни кхьенва, абур межлисрал, мел-мехъерик лугьузва, телевиденидай гузва.
Генани вичин уьмуьрдикай ва яратмишунрикай кIелзавайди гегьеншдаказ хабардар авун, вичин гьиссерин гъавурда тун патал ам алукьнавай ЦIийи йисан савкьват яз халкьдин вилик вичин «Жувакай…» цIийи ктаб гваз экъечIнава. Рангунин яцIу жилдер алаз, 352 чиникай ибарат яз ва 500 экземплярдин кьадарда аваз 2012-йисан декабрдин вацра Махачкъалада «Мавел» ООО-дин типографияда чапдай акъуднава. Ам са шумуд паюникай ибарат я. Гьакъикъатдани Ш. Шабатован «Жувакай…» ктабдай, шаирдин бажарагъ хьиз, адан руьгьни ачухдаказ аквазва. Ада кIелзавайдан фикир вичел желбзава.
Къелемдин стхадиз вичин биографиядихъ галаз сихдаказ алакъалу тир цIийи ктаб ва гьакIни 4-февралдин вич хайи югъ рикIин сидкьидай мубарак авунихъ галаз санал чаз адахъ чандин мягькем сагъламвал, хзанда бахт, берекат ва яратмишунрин рекье мадни еке агалкьунар хьана кIанзава.
Рухун Алидикай ва рухунвийрикай
Мукьвара зи гъиле 2012-йисуз Махачкъаладин «Мавел» ООО издательствода чапдай акъатнавай «Рухун Али ва рухунвияр» тIвар алай ктаб гьатна. Адан автор 1938-йисуз Рухунрин хуьре дидедиз хьайи, ЦIийи Макьарин хуьре яшамиш жезвай зегьметдин ветеран, динэгьли Рамазан Эмиргьамзаев я.
Ктабдин кьиляй кьатIуз жезвайвал, ана ихтилат 18-асирдин эхирра ва 19-асирдин сифте кьилера яшамиш хьайи машгьур алим ва шаир Рухун Алидикай, адан ирс кIватI хъувун патал чи алимрини яратмишдай интеллигенциядин векилри тухузвай кIвалахдикай физва. Ктабда гьакI Рухун Алидин «Марал», «Вун хвашкалди», «Куьз хъел я вун?», «Къе заз», «Регъуьхбан», «ВакIан хва (кавха Пиримаз», «Къирсакъирс (Дишегьлидин тариф), «Регъ» ва маса шиирар, куьгьне Рухун хуьруькай, хуьруьнвийрикай делилар, хуьруьхъни хуьруьнвийрихъ галаз алакъалу яз ктабдин автордин буба Мегьамедан (1886-1977-йисар) мецелай кхьей ихтилатар (агьвалатар) гьатнава. Лагьана кIанда, «ЛукIарин къеледиз губернатор атун», «Летен кьилел меле», «Регъве хьайи агьвалат», «Квачирдакни акатун мумкин я», «Пад хьайи нефс», «Садра чехирни хъвана», «Цанин хуьлекай хкатай балугъ» ва маса ихтилатар-рикIел хкунар айгьам, метлеб квайбур хьанва.
ШартIунин 9 печатдин чарчикай, 135 чиникай ибарат тир, яцIу жилдер алаз акъуднавай Рамазан Эмиргьамзаеван ктаб, санлай къачурла, кIелзавайбур патал метлеблуди хьанва.

Источник: газета "Кюринские известия"