Мад сеферда чапда

Тlвар-ван авай алим, писатель Гьаким Къурбана алатай йисуз кlелдайбурув вичиз тай авачир жуьредин «Лезгистан» тlвар алай энциклопедия агакьарна. Галатун тийижиз кlвалахзавай зариди гьакlни гьикаятдин хейлин эсерралди чи эдебият девлетлу авунва, ийизва. Мектебар патал хайи литературадин ктабар туькlуьрунин кlвалахдани алимди чlехи чка кьазва.
Тарихдиз хъфей йисан эхирда лезги халкьдин илимдинни медениятдин деятелрин ассоциациядин эхиримжи заседанидал «Лезгистан» энциклопедия мад сеферда чап хъувунин къарар кьабулнава. Чав и хабар агакьарай чешме Магьачкъалада акъатзавай «Настоящее время» тlвар алай газет я.
Къейд авун важиблу делил ам я хьи, ихтилат физвай энциклопедиядиз экв акурдалай кьулухъ, са акьван вахтни алатнач, ам надир затlуниз элкъвена, хейлинбур адан суракьда хьана. И делилдини, шаксуз, «Лезгистан» хъсан метлеб квай ктаб тирдан гьакъиндай шагьидвалзава.
«НВ» газетдиз гайи интервьюда къейднавайвал, цlийи кьилелай чап хъийизвай энциклопедияда дегишвилер, алаваярни жеда. «Месела, гзаф кьадардин материалар Азербайжан патан лезгийрикай Седакъет Керимовадин «Кцlар, кцlарвияр» энциклопедиядай ва маса чешмейрайни алаваяр хъийида. Цlийиз чап хъийидай ктаб мадни хъсанарун паталди тежрибани ава, вахтни, мумкинвилерни», - къейднава алимди.

К.КЪАЛАЖУХВИ