Алай йисан июндилай Бакуда чапдай акъатиз гатlумнавай лезги медениятдин «Алам» журналдин кьвед лагьай нумрадизни экв акунва. Гьам кlалубдин, гьам дизайндин жигьетдайни аямдин тlалабунрихъ галаз кьадайвал чапдай акъудзавай ранглу, ерилу, цlалцlам чарарин А4 форматдин 64-чиникай ибарат тир журнал тарифуниз лайихлу я лагьайтlа, лавгъа ихтилат жедач. Лезги меденият вилик тухунин, адакай жуван халкьдиз чир хьана кlани малуматар раижунин жигьетдай журналди тухузвай таблигъат гзаф важиблуди, герекди я. Нубатдин нумрада лезги, урус ва сад-зур азербайжан чlаларал кхьенвай макъалаяр гьатнава.
Тематикадин гегьеншвиликайни кьетlенвилерикай рахайтlа, абур журналдин жуьреба-жуьре рубрикайри субутзава. Мисал яз, 2-нумрада «Чи чlал», «Кулинария», «Критика», «Рецензия», «Шарвили», «Чи хуьрер» ва маса рубрикайрик кваз басма хьанвай макъалаяр иллаки марагълу я. Профессор Ярали Яралиев, композитор Мегьамед Гьуьсейнов, писатель Фейруз Беделахтул, шаир ва композитор Асеф Мегьман, журналист Абир Тагьиров, публицист ва шаир Азиз Мирзабеков, Ризван Ризванов хьтин машгьур ва сейли ксарин къелемдикай хкатнавай макъалаяр чап хьунухьи, шаксуз, журнал кесерлу ийизва.
«Азербайжан пата лезгийрихъ ихьтин журнал хьунухь чарасуз я, - лугьузва «Аламдин» журналист тир ватанперес Камран Къурбаналиева. - Квез чизва хьи, и пата мектебра лезги чlал физвач. Гьавиляй гьар са лезги ктаб, журнал, газет – ибур акьалтзавай несилриз гьам культура, гьамни хайи чlал чирунин чешмеяр я. «Алам» журнал Дагъустандин лезги районривни вахт-вахтунда агакьардай рекьер жагъуриз кlанзава чаз».
Эхь, ихьтин журнал акъудун регьят кар туш. Ам са жерге ватанперес ксари къуватар сад авуналди арадиз гъанвай журнал я. Къуй асирра вичин рехъ давамардай журнал хьурай!
Куругъли КЪАЛАЖУХВИ
Добавить комментарий