"Эренлардин сес" газетда чи сайтдикай кхьенва

Кьетlенвал авай сайт.
Мукьвара Интернетдиз вил вегьейла, лезги литературадиз талукь материалар авай сайтдал дуьшуьш хьана зун. Муькуь сайтрив гекъигайла, вичин кьетlенвални айрувал авай (www.lezgichal.ru) сайт газет кlелзавайбурун фикирдиз гъун кутугнавай кар я. Адан кьетlенвал адакай ибарат я хьи, сайтда вири малуматар, къейдер анжах лезги чlалалди ганва. Сайтдин кьилин чин ахъайдамазни, Мегьамед Ибрагьимова теснифнавай
«Чахъ Эминни, чахъ Сулейман хьанатlа,
Чаз Халикьди къагьриманар ганатlа,
Чи дамарра лезги иви аватlа,
Гаф сад ийин чlал паталди, лезгияр!»  таъсирлу бендина вил акьазва.
Ишлемишчийривай (пользователривай) сайтдикай гьихьтин менфят, лезет хкудиз жедатlа, кьилин чина ганвай адан кьилери къалурзава. Ингье сайтдиз хас тир кьилер: «Лезги чlал», «Махар», «Шиирар», «Лезги тlварар», «Тарих», «Мисалар», «Кьилдин ксар», «Эпос Шарвили» ва масабур. Къейд ийин, ина чи халкьдин тlвар-ван авай шаирар тир Миграгъ Къемеран, Куьре Меликан, Етим Эминан, Стlал Сулейманан, Лезги Няметан ва маса шаиррин яратмишунар, абурун уьмуьррикай къейдер ава.
Сайт арадиз гъайида къейд авурвал, вилик эцигнавай макьсад хайи литература халкьдин гегьенш къатариз чукlурун, сайтда раижзавай малуматар вири анжах лезги чlалалди гун я. Гьелелиг малуматар са акьван ганвачтlани, гележегда тарихдикай, медениятдикай тир маракьлу макъалаяр, материалар сайтдиз акъуддай фикир ава. Ибурни алава хъувуртlа, са шакни алачиз, сайт мадни менфятлуди, метлеблуди жеда.

Куругъли ФЕРЗАЛИЕВ