Вад лагьай мах

ЛАЦУ ХУДАТ, ЯРУ ЯРГУН 

Тамам варз тир вагьшийри 
Барбат1из чи шегьерар. 
Ник1еризни т1уш Гана, 
Барбат1из бул бегьерар. 

Хизри Мелик ацукьна 
Ч1ехи Худат к1еледа, 
Йикь-шуван тваз, гьарай тваз 
Гьар юкъуз са магьледа. 

Дагълар ч1улав зинданда 
Таран пеш хьиз зурзазва. 
Цуьквер хцин дердинай 
Йифиз шем хьиз, ц1разва. 

Кас-Бубани чуьнгуьр гваз, 
Чиг аламаз векьерал, 
Шарвилидин суракьда 
Экъеч1навай рекьерал. 

Хажалатдин крар я –  
Кас-Буба лап галатна. 
Эхир фена са дагъдин 
Къацу хурал акъатна. 

Са т1имил кьван яна ял 
Ам, манийрал илигна, 
Яргъал рекьяй хквезвай 
Лацу шиврез килигна. 

Шиврен винел алайди 
Шарвили вич хьтинд я. 
Къужахдавай бес адан 
А малайик вучтинд я? 

- Чан хва, чан хва, вун яни 
Саламатдиз хквезвай, 
Несиб хьана к1ани яр, 
Хайи чилихъ элкъвезвай? 

Фад агакьа хуьрерив, 
Анна ви рехъ хуьзва къе. 
Вагьши Хизри Мелика 
Хайи эллер гуьзва къе! 

Чпин лацу к1валерал 
Ч1улав рангар алтадна. 
Худатвийрин мал-девлет 
Садакьадиз акъатна. 

Агъбат хийир, хтана 
Шарвили фад Ватандиз. 
Лацу к1валер эцигна 
Аквадайвал душмандиз. 

Кьакьан, лацу к1валерив 
Хуьруьнвияр агатна. 
Акурла и аламат, 
Меликан рик1 аватна: 

- Ам вуж кас я шегьерда 
Лацу к1валер тунвайди? 
Ам вуж кас я вич икьван 
Залай вине кьунвайди? 

Худатвияр алт1ушна 
Шарвилидин к1валерал. 
Тажуб хьана атайбур 
Акур залан къванерал. 

Дагъдин патар иниз гьик1 
Гъанат1а и гадади? 
Гьик1 и къванер къутнерал 
Кьунайт1а и гадади? 

Хизри Мелик ацукьна, 
Гьатна гьуьле хиялдин, 
Тажуб хьанваз к1валерал 
Шарвилидин – кьегьалдин. 

- Ваъ, - лагьана душманди, -  
Завай ам ик1 кьаз жедач. 
Эвер хана майдандал, 
Завай ам ик1 хаз жедач! 

Маса са кар, маса рехъ 
К1анда тадиз акуна. 
Шарвили вуж кас ят1а, 
Зун гъавурда акьуна. 

Хизри Мелик агъзурра 
Акъатайд я арайрай. 
Шарвилидин крари 
Акъуднач ам к1арарай. 

Кьегьал рекьиз к1ан хьана 
Чинебан са тегьерда. 
Мугьманвилиз жегьилдиз 
Вичин к1вализ эверна. 

Кас-Бубади лагьана: 
- Адан к1вализ фимир вун! 
Адакай ваз дуст жедач, 
Гьич ягъалмиш жемир вун! 

Ада вичин гьаятда 
Ат1анва ваз ирид фур, 
Ак1урнава кьилихъди 
Гьар фурани ирид тур. 

К1евирнава фурарин 
Сивер т1имил накьвадив. 
Тваз к1анзава фурара 
Вун адаз ик1 футфадив! 

Шарвилиди фикирна, 
Ахпа жаваб Гана мад: 
- Гаф ганва за Меликаз, 
Хьайи к1валах хьана ад. 

Экуьнахъ фад экъеч1на 
К1валяй вичин Шарвили. 
К1еледиз физ залумдин 
Хьана к1вачин Шарвили. 

Гьаятдилай са камна, 
Экъеч1на ам к1валериз. 
Хизри Мелик кис хьана, 
Гъам чк1ана вилериз. 

И вахтунда ашпазри 
Суфра вилик эк1яна, 
Агъуяр квай ашдин кьил 
Эгьтиятдив ахъайна. 

Шарвилиди яна вил 
Жерге-жерге къапариз. 
Адаз исят к1ан хьанач 
Рик1евайди хабариз. 

Кас-Бубади вуганвай 
Туп1ал галай гъиливди 
Т1уьна ада аш вири, 
Хуьзват1ан вич виливди. 

Туп1алди кар акуна –  
Михьна агъу ашдик квай. 
Шарвилидиз зат1 хьанач, 
Душманд рик1и кьуна ц1ай. 

Хъел кваз къецел экъеч1на, 
Гьарай гана ашпаздиз: 
- Вуна авур ашдивай 
Зат1ни хьанач а касдиз! 

И вахтунда ашпазди 
Гана кациз са т1ур аш, 
Кац гиликьна гьасятда, 
Гьял тахьанмаз а т1уьр аш. 

Хизри Мелик акъвазна, 
Мягьтел хьана акурдал: 
- Бес и касдин рик1е раб 
За гьи саягъ ак1урда? 

И вахтунда Шарвили 
Тадиз к1вачел къарагъна, 
Чин элкъуьрна дагъларихъ, 
Вичин саягъ гьарайна: 

- Эллер, эллер, къарагъа, 
Вахт я душман чукурдай! 
Хизри Мелик табийна, 
Бахтунин экв куьк1уьрдай! 

Ик1 лагьана, гадади 
Кьуна гардан Хизридин, 
Са легьзеда шуп1арна 
Кьил зегьерлу к1изридин. 

Шарвилидин ван хьайи 
Чуьллер тадиз авагъна. 
Шарвилидин ван хьайи 
Эллер к1вачел къарагъна. 

Ирид юкъуз дерейра 
Хьана халис кьегьалар. 
Ирид юкъуз ксанач 
Вилаятар, магьалар. 

Ирид юкъуз авахьна 
Душманд иви, вац1ар хьиз. 
Ирид юкъуз къирмишна 
Душман, кьуру нац1ар хьиз. 

Хайи чилер душмандин 
К1вачерикай хкатна. 
К1валяй, хуьряй, убадай 
Манидин ван акъатна. 

Ахпа вири шегьерар 
Лацу хьана, эвел хьиз. 
Талаярни дереяр 
Къацу хьана, эвел хьиз.