Куьчхуьр Саид

Лезгийрин зурба шаир Саид Куьчхуьррин хуьре (гилан Кьурагь район) 1767-йисуз лежбердин хизанда дидедиз хьана. Саида медресада кIел-кхьин чирнай, амма фад етим хьун себеб яз адавай медреса куьтягьиз хьанач. Жегьил гадади, дарвал себеб яз, къунши хуьрера ва Азербайжанда кIвалахзава. Саидаз виринра ханари, беглери агъавал ийизвайди аквазва. Ада и нифретлу девирдин гьахъсузвилер дериндай гьиссзава ва «Авайвилиз хьурай лянет», «Къарагъун», «зи чарх кьулухъ элкъвенва», «Лянет» шиирра вичин хайи хуьре агъавал ийизвай Сурхай хан русвагьунихъ галаз санал инсанпересвал, гбахъвал, мердвал тестикьарзва. Саидан девлетлуйриз акси, бунчивилин фикирар квай эсерри Сурхай хан адал ажугълу ийизва. Сурхай хандиз Саидакай вичин гъилибан ашукь ийиз кIан хьанай, амма шаирди адаз икрамнач. Акси яз, Саида зулумкар Сурхаян алчах крар винел акъудзава, ачухдиз халкьдин тереф хуьзва. Сурхая вичиз табий тахьай шаирдиз кар кьун кьетIна. Ада Саидаз вичин кIвале кьиле фейи межлисдиз эверна ва ина шаир вичин папариз ягьсузвилелди килигзава лагьана, багьна кьуна, жаллатIрив адан вилер акъудиз туна. Амма Саид и зулуматдин кардини ругьдиз ажузнач, ада мадни дерин ва хци бунчивилин фикирар квай чIалар туькIуьриз хьана. Куьчхуьр Саид 1812-йисуз кечмиш хьана.

Акимов Къ. Х. «Лезги зарияр»