Килигна зун, рехи хьанвай чӏарариз,
Кьуьзуьвилиз ахъа хьанвай варариз,
Чанда гьатай саврухариз, гарариз,
Вилик туна чӏаба бармак за жуван,
Веревирдна, гьиниз физватӏа инсан!
Кьакьан сувар гару гатаз руг жезва,
Баябан чуьл, са стӏал цив рук жезва,
Къе садан сур, са масадаз муг жезва,
Вилик туна чӏаба бармак за жуван,
Веревирдна, гьиниз физватӏа инсан!
Аватна чун, и дуьнядин сафуниз,
Чара авач, инал уьмуьр авуниз,
Физва йикъар, лукӏ хьана са руфуниз,
Вилик туна чӏаба бармак за жуван,
Веревирдна, гьиниз физватӏа инсан!
И дуьнядиз къвезва аял векъи яз,
Гьализ уьмуьр вил ичӏи яз, пехъи яз,
Хъфизва ам кьил агъузна, регъуь яз,
Вилик туна чӏаба бармак за жуван,
Веревирдна, гьиниз физватӏа инсан!
Рубрика
Добавить комментарий