Жуваз берекат бул хьайила, четин вахтунда рикIел къвезвай кас рикIел хкана кIанда.
Гьар халкьдихъ вичин къуьрерни жанавурар ава.
Аялдиз чIуру тербия гун са тербияни гун тавунилай зиян я.
Бязибур Аллагьдихъ инанмиш жез башламишзава, жувахъ инанмишвал квахьайла.
Аллагьди инсан гьава, рагъ, яд, ахвар ва тIуьн авачиз яшамиш тежедайвал авунва, инсанди — пул авачиз.
Шадвилин бинеда авайди жибиндин гьал туш, келледин гьал я.
Инсандихъ еке буржар кьуд ава: Аллагьдин, диде-бубадин, Ватандин ва вичин аялрин вилик.
Инсан яш жердавайни акьуллу жедач, эгер адахъ уьмуьрдин тарсарикай менфят къачудай алакьун авачтIа.
Кьилел атанвайди гъвечIи бала ятIани, фагьум ая, ам чIехи бала тахьун патал атанвай хабар хьунни мумкин я.
Дишегьлиди рангар ягъайла, адан гуьзелвал артух яз аквада, итимди – пул пара къазанмишдайла.
Эвленмиш хьайила, папан тербиядик квай нукьсанар адан диде-бубадин тахсир я, эвленмиш хьайи са вад йисалай кваз хьайи тербиядин нукьсанар — адан итимдин.
Хуьруьн кавха хуьруьн тарих чидай кас хьана кIанда. Алатай вахтунин тарихдин къадир авачирдаз къвезвай вахтунин тарихдин къадирни жедач.
Бубади гафаралди тербия гуда, Аллагьди — тежрибадалди.
Чи уьмуьр чи бубайрин савкьат я чаз, абурун тIвар хуьн — чи патай абуруз чухсагъул.
Инсан, ихтилатдин са кьатI ван хьайила, муькуь кьатI вичи туькIуьриз алахъзава.
Аялди пачагьдин фикирар кьатIун чавай кьабулиз жезвач, амма инсанди Аллагьдин фикирар кьатIун — кьабулзава.
Урус чIалал рахадайла, и девирдин лезгидиз вич масабуруз савадсуз яз къалурун сад лагьай айиб кар я, аварвидиз — вич масабуруз рикI ажуз яз къалурайтIа.
Алатай вахтунин гьайифар чIугвада алай вахтунал рази туширда.
Эгер на ви шерикдиз еке ва гъвечIи ичер теклифайтIа, вуна нихъ галаз кIвалахна кIандатIа ваз чир жеда.
Бедбахтвал акурдаз хьиз бахтунин къадир масадаз чир жедач.
КIанивиле — пуд лагьайди, спортда — кьвед лагьайди, пул гудайнал — сад лагьайди садазни жез кIан туш.
Виликдай агъсакъалар кимерал ацукьдай, гила — интернетда.
Инсанриз фикир гунин хесет, яшар хьайила, инсанрин рикIе авайди аквадай алакьуниз элкъведа.
Кьуьзуь жердавай акьуллудакай мадни гзаф акьуллу кас жеда, ахмакьдикай – кьуьзуь ахмакь.
ГалчIур жез-жез яшамиш жезвай инсан метIерал акъвазариз жедач.
Пиянискавал уьмуьрдин вилик капитуляция авунай кьун я.
Виридаз чпин бине ава, виридаз бине ганвай Садалай гъейри.
Ханди хуьрер гужуналди тарашдай, райондин кьили – схемадалди.
Пара авур хъсанвилер ужуз аквада.
Ноль хьтин инсанди вичин къваларив цифраяр эцигда.
КичIевили акьул бушарда, уьтквемвили – мягькемарда.
Гъалиб хьайидаз гаф гуда, кIаник акатайдаз фикир жеда.
ГъалатIар вердиш хьунин пай я, четинвилер – мягькем хьунин.
Хкажнавай инсанди виняй килигда.
Шадвилин бинедавайди жибиндин гьал туш, акьулдин гьал я.
Виридалайни хъсанди яз хьуни бязи вахтара амайбур вири ферсузбур тирдакай лугьуда.
Пис киноди вахт рекьида, хъсанда вахт рикIелай алудда.
Жегьил бубадиз хва ва жегьил дидедиз руш кIан хьайитIани, яшлу бубадин рикI рушал пара жеда, яшлу дидедин рикI – хцел.
ЭлячIна фейи бедбахтвиликай тарс хкуд тавурла, ам элкъвена хтун мумкин я.
Масадалай аслу туширвал такунвай аялдикай, яшар хьайила, хкатдайди чIехи аял я.
Дишегьли авайдалай гуьрчег аквада рангар янавайди, итим – пул квайди.
Жегьилри винел патариз къимет гуда, яшлубуру – къене патариз.
Зайифбурун вилик – аслан, зурбабурун вилик – шенпIи.
Компьютерарни смартфонар пайда жедалди, аялар кIвализ хкун четин тир, гила кIваляй къецихъ акъудиз четин хьанва.
Виликдай аялри урус чIал чир хьунал дамахдай, гила лезги чIал чир хьунал дамахдай девир алукьнава.
«Лезги газет»
Добавить комментарий