Зи лезги чил, зи Лезгистан

Зи лезги чил, зи Лезгистан,
Шуьше дагълар кьилеллай.
Дуьзмиш хьайи багъни бустан,
Гими я вун гьуьлеллай.
Йигин вацIар, дере кьакьан,
Гьава кьезил, михьи я.
Къастунал чи гьар са инсан
Гьулдандилай кIеви я.
Пагьливанар хьайид я вахъ
Шагь дагълари хур гайи,
Шарвилини Куьре Мелик...
Чи душманриз кlyp гайи.
Шарвилидин несилри чи
Дагълар уьлкве хвейид я.
Гьа уьтквем тир рухваярни
Чи дидейри хайид я.
ТIурфанривай са чIавузни
Дагълар ажуз хьайид туш.
Чи игитри гьич садрани
Душмандиз рей гайид туш.
И къудратлу лезги миллет
Чи еридихъ амай кьван,
Душмандиз кам жедач, гьелбет,
СтIал иви кумай кьван.
Хьайид я чахъ мадни кьегьал,
Илим чидай рухваяр:
Ал-Ярагъи, Мирзе Гьасан...
Акьул дерин архаяр.
Сулейманни Етим Эмин
Лезги чилин гъетер я.
Гуьзгуь-чIалар чи уьмуьрдин
Рехъ къалазвай эквер я…
“Лезгинка” кьуьл ийизва къе
Чилин шардин гьар пипIе.
Лезги стха ава кIвенкIве,
Къазанмишиз тIвар еке.