Акунач

И дуьня вуч залан хьанава
Заз гьич дугъри кар акунач.
Кесиб къвазна бегдин вилик
Рахаз ихтияр акунач.

Акъатзава фуахъ зи вил,
Агакьзавач адахъ зи гъил,
Сад шехьзава, гатаз мет-кьил,
Лежбер бахтавар акунач.

Я лугьуда инсанар сад,
Бес вучиз чи уьмуьр туш шад?
КIвалахайтIан рекьир кьван мад
Зегьмет-багъдин бар акунач.

Абдуллагьан дерт я чIехи,
Девлетлуяр хьанва пехъи.
Гатун кьиляй чуьлда некьи,
Зулухъ багъда нар акунач!