2016-йисуз Дагъустандин Кьилин къарардалди 21-октябрь Дагъустандин медениятдин ва чlаларин югъ яз тестикьарнай. Цlи кьвед лагьай сеферда къейд авур и цlийи сувари лезги эдебиятда яргъалди фикирда амукьдай гел туна.
21-октбярдин нянин сятдин 3-даз Ахцегьрин Медениятдин кlвалин гегьенш залда Дагъустандин медениятдин ва чlаларин йикъан сергьятра аваз лезги манийрин ва шииррин гурлу межлис кьиле фена. И юкъуз Азербайжандай лезги шаиррин са десте мугьман хьанвай: «Алам» журналдин кьилин редактор Камран Къурбаналиев, «Марвар» эдебиятдин кlватlалдин кьил, алай аямдин машгьур шаир Эйваз Гуьлалиев, журналист, этнограф Абир Тагьиров, шаир Зерифа Кьасумова, таржумачи Бести Нефтиева, манидар Магьира Ширинова.
Малум хьайивал, «Марвар» эдебиятдин кlатlалдин векилар Ахцегьиз и райондин кьил Осман Абдулкеримован теклифдалди атанвай.
Эйваз муаллимдин теклифдалди и хъсан межлисда иштиракдай бахт зазни хьана. Гьеле мярекат гатlун тавунмаз агьалийри залда чпиз чкаяр кьазвай. Анин ракlарар вирибуруз пулсуздаказ ахъа тир. Вад-цlуд декьикьадилай акуна хьи, зал ацlанва. Аквадай гьалда, ахцегьвийриз мукьвал вахтара шииратдин межлис ахкунвачир.
Межлис ачухай Медениятдин кlвалин къуллугъчиди Азербайжандай атанвай мугьманриз сегьнедиз эверна. Сифте гаф Ахцегь райондин кьилин заместитель Алмас Шуаеваз гана.
Ада кlватl хьанвайбуруз Дагъустандин медениятдин ва чlаларин югъ тебрикна, лезги эдебиятдин къадимлувиликай, Азербайжандинни Дагъустандин алакъайрикай ихтилатна. Мугьманрихъ элкъвена вичин ва райондин кьилин патай сагърай лагьана.
«Лезги эдебият вилик тухузвай шаирриз, къелемчийриз гьамиша гьуьрметна кlанда», - лагьана А.Шуаева.
Мярекат кьиле тухун Камран Къурбаналиеван ва Эйваз Гуьлалиеван хиве туна. К. Къурбаналиева тебрикдин гафарилай кьулухъ «Алам» журналдикай, «Марвар» кlватlалдикай, четинвилеризни фикир тагана, тухузвай кlвалахрикай умуми ихтилатна.
Микрофон ялавлу шаир Э.Гуьлалиеван гъиле гьатна. Рахун шиирдиз элкъвенвай ватанэгьлиди гьа сифте декьикьадилай залда ацукьнавайбур гьейранарна. «Дидед чlалал зуракl рахун гунагь яз» гьисабзавай, хайи чlалал, шииратдал кlевелай кьару, «лезги шиир машгъулатдин ваъ, кар я зи..» лугьузвай шаирди гьевесдивди шиирар кlелна.
Нубатдин гаф шаир Зерифа Кьасумовадиз гана. Адани вичин цlийи шиирар кlелуналди ахцегьвийрин гуьгьуьлар ахъайна. Манидар, композитор Магьира Шириновади сифте «Дагъустан» тlвар алай мани, Ахцегьрин медениятдин кlвалин гьевескар манидарри «Дагъустан – Азербайжан» мани тамамарна.
Лезги чlалай урус чlалаз шиирар таржума авунал машгъул Б.Нефтиевади сегьнедал лезги шаиррин шиирар сифте лезгидалди, ахпа вичи авунвай таржумаяр урусдалди кlелна.
Гуьгъуьнлай Ахцегьай тир шаир, «Лезги газетдин» мухбир Ахцегьви Сулеймана вичин «Лезги халкь» шиир кlелна, и цlарарин авторди Лезгистандай Лезгистандиз атанвай мугьманар тебрикна, «Алам» журналдин къуллугъчийри чlал патал, халкь патал, меденият патал, эдебият патал нелай хьайитlани алакь тийидай кlвалах тухузвайди къейдна.
Камран Къурбаналиева Ахцегьрин ктабханадиз чпин патай Азербайжанда эхиримжи йисара акъатнавай лезги шаирринни гьикаятчийрин цlийи ктабрин хара, «Алам» журналдин саки вири нумраяр пишкешна.
Журналист, этнограф Абир Тагьирова къадим Ахцегьрикай итижлу ихтилатарна.
Мугьманри анжах чпин шииррихъ, манийрихъ ваъ, чкадин шаиррихъ, манидаррихъ яб акалдай мумкинвални гана. Икl, жегьил шаир Жамиля Саидовади, яшлу шаир Лга Энвера, Эльдар Адилханова таъсирлудаказ чпин яратмишунар кlелна.
Эхирдай Камран Къурбаналиева чпиз теклиф авунай райондин кьиле авайбуруз, иштиракчийриз, межлис кьиле тухуз куьмекар гайибуруз сагърай лагьана.
Мярекат саки пуд сятда кьиле фена. Ахцегьвийри «иштягьдивди» яб акална, лезет хкудна. Манияр тамамарайбур, шиирар кlелайбур гурлу капаралди кьабулзавай. Са шакни алачиз, и шад межлис ва Азербайжандай атай мугьманар ахцегьвийрин рикlера яргъалди амукьда.
Куругъли ФЕРЗАЛИЕВ
Добавить комментарий