Инсан хьиз адакай вирибур рикI алаз рахада: «Чина хъвер авай, умун, къени къилихрин, дамах гвачир кас я, - лугьуда, - дуствилиз вафалу, вичин халкьдин хьиз, маса халкьарин тIварни вине кьадай, абурун медениятдиз ва эдебиятдиз гьуьрмет ийидай, кIеве аваз акур гьар са касдиз куьмекдин гъил яргъи ийидай, чка атайла гаф чинал лугьудай, виринра дагъвийрин адетар хуьдай халисан лезги я.» Куьрелди, гьа сад хьтин гафар лугьуда вирибуру: «Экуь, михьи инсан я.»
Алим хьиз адан алакьунар ва агалкьунар са куьнивни гекъигиз жедач. Гзаф йисара гьакъисагъвилелди кIвалахзавай ада чи фольклордин ва эдебиятдин икьван гагьди чаз тийижир чинар кхьиналди, кар алай илимдин ахтармишунар тухуналди, лезги зарийрин яратмишунриз талукь антологияр ва кIватIалар арадиз гъуналди чи эдебиятдин тарихдик лугьуз тежедай кьван зурба пай кутуна. Ада Ялцугъ Эмин, Лезги Агьмед, Ашукь Суьйгуьн хьтин чIехи шаирар халкьдив вахкана. Алимди неинки сифте яз Кьуьчхуьр Саидан ва Ахцегь Гьажидин шииррин кIватIалар туькIуьрна, гьакIни СтIал Сулейманан поэзия са вахтунда адак кутунвай рехнейрикай михьна, цIийи редакцияда кIелдайбурув агакьарна.
Вичикай ихтилат физвай чи машгьур эдебиятдин ва фольклордин пешекар, филологиядин илимрин кандидат, профессор Гьажи Гашарован «Лезги литература», «Лезги поэзиядин антология», «Лезгийрин ашукь поэзия ва литература» ктабар ва маса эсерар тай авачир къиметлу чешмеяр я. И рекьяй ада чIугвазвай зегьмет гекъигиз тежерди я.
Фольклордин пешекар хьиз Гь.Гашарова гзафбуруз чешне къалурзава. Ада 1989-йисуз А. Гъаниевадихъ галаз санал чапдай акъудай «Лезги халкьдин махар», 1999-йисуз А.Рашидовахъ галаз санал кIелдайбурув агакьарай «Лезги фольклор», 2010-йисуз мадни гьа кас туькIуьрайбурукай сад яз басма авур цIийи ктаб гъилерай-гъилериз фена. Алимди 1973-йисуз чапдай акъудай «Лезгийрин игитвилин манияр» чи эдебиятдал рикI алай ксари чпин ктабханайра багьа тир ядигар хьиз хуьзва. Сифте яз чи ашукь поэзиядиз илимдин рекьелди къимет гайи ада, чи фольклордикайни цIийи гаф лагьана.
Педагог хьиз Дагъустандин Гьукуматдин Университетдин лап хъсан муаллимрикай тир профессор Гьажи Гашарова юкьван мектебар, педучилище ва вузар патал шумудни са учебникарни программаяр кхьенва. Мисал яз 9-синифар патал кхьенвай «Лезги литература», 11-синифар патал чапдай акъудай «Дагъустандин литература», ДГьУ-дин студентар патал лезги литературадин тарихдиз ва фольклордиз талукь программаяр ва маса ктабар къалуриз жеда.
Юбиляр хьиз «Самур» газетдин коллективди вичин 80 йис хьанвай Гьажи муаллимдиз чандин сагъвал тIалабзава. Тек са ахцегьвийрин ва лезгийрин ваъ, вири дагъустанвийрин дамах тир чи алимдихъ мадни яргъи уьмуьрар ва цIийи агалкьунар хьурай!
Инсан хьиз адакай вирибур рикI алаз рахада: «Чина хъвер авай, умун, къени къилихрин, дамах гвачир кас я, - лугьуда, - дуствилиз вафалу, вичин халкьдин хьиз, маса халкьарин тIварни вине кьадай, абурун медениятдиз ва эдебиятдиз гьуьрмет ийидай, кIеве аваз акур гьар са касдиз куьмекдин гъил яргъи ийидай, чка атайла гаф чинал лугьудай, виринра дагъвийрин адетар хуьдай халисан лезги я.» Куьрелди, гьа сад хьтин гафар лугьуда вирибуру: «Экуь, михьи инсан я.»
Алим хьиз адан алакьунар ва агалкьунар са куьнивни гекъигиз жедач. Гзаф йисара гьакъисагъвилелди кIвалахзавай ада чи фольклордин ва эдебиятдин икьван гагьди чаз тийижир чинар кхьиналди, кар алай илимдин ахтармишунар тухуналди, лезги зарийрин яратмишунриз талукь антологияр ва кIватIалар арадиз гъуналди чи эдебиятдин тарихдик лугьуз тежедай кьван зурба пай кутуна. Ада Ялцугъ Эмин, Лезги Агьмед, Ашукь Суьйгуьн хьтин чIехи шаирар халкьдив вахкана. Алимди неинки сифте яз Кьуьчхуьр Саидан ва Ахцегь Гьажидин шииррин кIватIалар туькIуьрна, гьакIни СтIал Сулейманан поэзия са вахтунда адак кутунвай рехнейрикай михьна, цIийи редакцияда кIелдайбурув агакьарна.
Вичикай ихтилат физвай чи машгьур эдебиятдин ва фольклордин пешекар, филологиядин илимрин кандидат, профессор Гьажи Гашарован «Лезги литература», «Лезги поэзиядин антология», «Лезгийрин ашукь поэзия ва литература» ктабар ва маса эсерар тай авачир къиметлу чешмеяр я. И рекьяй ада чIугвазвай зегьмет гекъигиз тежерди я.
Фольклордин пешекар хьиз Гь.Гашарова гзафбуруз чешне къалурзава. Ада 1989-йисуз А. Гъаниевадихъ галаз санал чапдай акъудай «Лезги халкьдин махар», 1999-йисуз А.Рашидовахъ галаз санал кIелдайбурув агакьарай «Лезги фольклор», 2010-йисуз мадни гьа кас туькIуьрайбурукай сад яз басма авур цIийи ктаб гъилерай-гъилериз фена. Алимди 1973-йисуз чапдай акъудай «Лезгийрин игитвилин манияр» чи эдебиятдал рикI алай ксари чпин ктабханайра багьа тир ядигар хьиз хуьзва. Сифте яз чи ашукь поэзиядиз илимдин рекьелди къимет гайи ада, чи фольклордикайни цIийи гаф лагьана.
Педагог хьиз Дагъустандин Гьукуматдин Университетдин лап хъсан муаллимрикай тир профессор Гьажи Гашарова юкьван мектебар, педучилище ва вузар патал шумудни са учебникарни программаяр кхьенва. Мисал яз 9-синифар патал кхьенвай «Лезги литература», 11-синифар патал чапдай акъудай «Дагъустандин литература», ДГьУ-дин студентар патал лезги литературадин тарихдиз ва фольклордиз талукь программаяр ва маса ктабар къалуриз жеда.
Юбиляр хьиз «Самур» газетдин коллективди вичин 80 йис хьанвай Гьажи муаллимдиз чандин сагъвал тIалабзава. Тек са ахцегьвийрин ва лезгийрин ваъ, вири дагъустанвийрин дамах тир чи алимдихъ мадни яргъи уьмуьрар ва цIийи агалкьунар хьурай!
«САМУР» газет
Добавить комментарий