Шикил

Са шикилди килигзава цлалай,
Лал са шикил - авач адахъ рахар мез.
И шикилди - диде-буба саналлай,
Ийизва заз гила абур чеб эвез.
 
Авай лугьуз, диде-буба, ягъалмиш
ХьанатIа жал - фикириз за, хазва кьил.
Саки хьанач гьич дуьньядал яшамиш,
Саки даим хьайид я тек и шикил.
 
КьатIузва за, кьетIен фикир гайила,
Абурун руьгь даим винел ала зи.
Бегьем тушир са кlвалахдихъ гелкъвейла,
Туьнбуьгьрикай чуьнуьх тежез ава зун.
 
Папав къализ, ван хкажиз тадач зав,
«Сусав къалдайд такурай чи вилериз».
Аялрин хъел за зи къене чIугвазва,
“КичIе мижер,” - вил ягъазва хтулриз.
 
Начагь хьана алай чIавуз месел зун,
Чан-рикIзава заз бубадин вилери.
Мелгьем жезва дидедин са килигун,
Авхарзава зи тан саки гъилерив.
 
Са шикилдин кIаник ксуз-къарагъиз,
Авазва зун, рекье твазва йисар за.
Хайибурун ванци, легьзед карагиз,
Яшайишдин гьевесар зав хуьзава.