ЦIинин йисан 29-январдиз агъсакъал муаллим, шаир, Азербайжандин ва лезги кхьирагрин кIватIалрин уьзвуь, чи газетдин дустарикай сад тир Мегьамед Агъа (Мегьамедов Мегьамед Агъадин хва) уьмуьрдин 87-йиса аваз чавай къакъатна.
Мегьамед Агъа 1930-йисан 9-апрелдиз Эвежугъ хуьре дидедиз хьана. Ада юкьван мектеб, 1953-йисуз Азербайжандин пединститут куьтягьна, 60 йисалай пара муаллимвиле кIвалахна. Сифте Хизи районда, гуьгъуьнай чи райондин Хьилерин хуьре муаллимвал авур жегьил педагог 1963-йисуз хайи хуьруьз хтана. Ина ада дяведин йисара кIелер зуракI амукьай жегьилриз нянин мектебни тешкилна. Биологиядин тарсар гузвай Мегьамед муаллимди гзаф йисара завучвални кьилиз акъудна, директорвални авуна.
Халисан пешедилай алава летературадал, поэзиядал рикI алай Мегьамед Агъадин шиирар, гьикаяяр, мезелияр ва маса эсерар алатай асирдин 50-йисарилай газетриз ва журналриз акъатзавай хьиз, уртах кIватIалрани гьатзавай.
Литературада ада вичин гел парадни-пара аялрин шаир-кхьирагди хьиз тунва. Вири уьмуьр аялриз чирвилер гунив машгъул хьайи Мегьамед муаллимдиз гъвечIибурун хесетар хъсандиз чидайвиляй адан яратмишунра аялар патал кхьенвай эсерри кьетIен чка кьазва. Вич шумудни са хтулдин, штулдин чIехи буба тир адан къелемдикай лезги, азербайжан ва урус чIаларал басма хьанвай 30-далай пара ктаб хкатнава. Ибурун чIехи пай чи гележег тир аялар патал кхьенвайбур я. Адан "ГъвечIи Фатма ва рагъ" (1991), "Авач ахвар булахдиз" (1999), "Мезелияр" (2000), "Насиран кIел" (2000) ва «Медалар алай кицI» (2001) ктабар и цIиргъинихъ акатзавайбур я.
Чна адан хизандиз, багърийриз, мукьва-кьилийриз башсагъвал гузва ва Аллагьдивай абурун рикIериз сабурар гун тIалабзава.
“КцIар” газет
Добавить комментарий