Забит Ризванован 90 йисан юбилей

26 ноябрдиз Дербент шегьерда СтIал Сулейманан тIварyних галай Лезги Девлет драм театрдин дараматда чи халкьдин чIехи къелемегьли Забит Дадашбаладин хва Ризванован 90 йисан юбилейдиз талукь мярекат кьиле фена. Дараматдин зал Магьачкъаладай, Дагъустандин районрай, Азербайжандай, гьакIни Урусатдай атанвай хайи чIалал, културадал рикI алай векилрив сиве-сивди ацIанвай. Сегьнеда жив алай дагъларин фон галаз чугнавай портретдай Забит малимди вичин тварцел кIват хьанвай ватанегьлийриз са кIус хиялриз фенвай вилеривди килигзавай.
Нисинлай къулух авалай юбилейдин мярекат сифте гафунивди театрдин кьилин режиссер Мирзебег Мирзабегова ахъайна. Ада Забит малимдин чIехивиликай, шаирди халкьдин патал чугур зегьметрикай куьрелди рахана ва ихьтин мярекат кьиле тухун шаирдин руьгьдин вилик чи буржи тирди мадни рикIел хкана. Ахпа мярекат кьиле тухун патал гаф профессор Гьажи Гашароваз гана.
Забит Ризванован уьмуьрдикай, адан туькIуьруьнрикай, халкьдин рекье авур квалахрикай гегьеншдаказ Дагъустандин халкъдин шаир Арбен Къардаша доклад авуна. Вичин докладда ада Забит малимди шаирди хьиз, публицист-прозаикди хьиз, гьакIни са ижтимаи хадимди хьиз чи рикIера, културада чIехи гел турди къалурна.
Мярекатда парламентдин депутат, Тохо Годидин тIварунихъ галай институтдин директор, профессор Гьамидулла Мегьамедов, зарияр Сажиддин Сейидгьасанов, Фейзуддин Нагиев, Зуьлфуькъар Къафланова, Азиз Мирзабеков, Хуь­- руьгви Магьмуд Абдулкеримова, «Лезги газетдин» кIвалахдар Мегьамед Ибрагьимов ва маса­- бур Забит малимдикай чIехи гьуьрметдивди рахана, шаирдихъ галаз санал хьайи йикъар, ихтилатар рикIел хкана, адан чIехи инсанвиликай чпин рикIин гафар лагьана. Кьулан вацIун къиб­ле патай атанвай мугьманрикай Агъакишиев Шагьмардана, Чпирви Эйваза, "Алам" журналдин редактор Къурбаналийрин Камранани Забит малимдикай рикIин гафар рахана ва чIехи пафосдив шаирдиз талукъ шиирарни хуралай лагьа­на. Забит Риз­ванова пудкъад лагьай йисара Азербайжанда са шумуд мектебдин пун кутунвайбурукай сад я. 
-«РикIин гаф» литературадин кIватIалди са шумуд несил зарияр арадал гъана. Къе адан рехъ «Марварди» кьиле тухузва.
-КцIарин халкьдин театрдинни кьуьлердай ансамблдин бинедаллаз къе Девлет Драм театр кардик ква.
-КцIарин халкьдин яратмишунрин кIвализ регьбервалзавай чIавара вишералди маниярни махар, агъзурралди лирлиярни бубайрин гафар, гьакIни кьегьалвилин эпос «Шарвили» кIват хъувуна халкьдив ахгакьарна. Къе и мектеб Дербентда туьхкIуьр хъувуниз игьтияж ава лагьана теклифарни гана.
Мярекатдин ресми паюнин эхирда Забит Риз­ванован хва Ризван рахана. 
Ада Забит малим рикIел хкин патал ихьтин мярекат арадал гъун патал къуьн кутур, куьмекар гайи ксариз виридаз тIвар кьаз вичин разивал къалурна, рикIин сидкьидай сагърай лагьана.
Мярекатдин гуьгъ хъсан концерт программадив давам хьана. Концертда тIвар-ван авай манидарар, Дагъустандин халкьдин артистар Фаризат Зейналовади, Тарлан Мамедова Абдул Гьабибова ва масадбуру лагьай заридин гафариз туькуьрнавай ва халкьдин манияр залда авайбуру ван алай капаривди кьабулна. «Шарвили» эпосдай мектебда кIелзавай са иер лезги руша хуралай лагьай чIехи чIукI залдавай инсанри иллаки пара чимиз кьабулна.
Кьуд сятунилай пара фейи мярекат къуьтягь хьайидалай кьулух залдай экъечIзавай инсанрин чинриз килигайла, абур-халкьдин чIехи хва За­бит рикIелай алуд тавуна, адан тIварцел ихьтин са мярекат хьуникай ва гьа мярекатдин къене чебни хьуникай гзаф рази тирди кьатIуз жезвай.

Багьрам Залов,
Худат ш.
"АЛАМ" журнал