Зак илгьам кутур «Илгьамдин Пери»

З. Ризвановаз бахшзава

За к1елна а ктаб садра ваъ, пудра,
Ашкъи кутаз зи ц1ийи умудра,
Халисан гафар лугьуз шумудра,
Тикрарзава за гьуьрметдив жери:
Зак илгьам кутур «Илгьамдин пери»!

Рахазва ам чи т1ебиатдикай,
Инсандин дамах – пак зегьметдикай,
На къачу илгьам гьакъикъатдикай.
Къалуриз гьа ик1 илгьамдин ери,
Зак илгьам кутур «Илгьамдин пери»!

Вилер шиирра, хиял Самурд кьере…
Гагь къекъвезва зун Ахцегьрин хуьре.
Хуралай кьат1уз Къубани Куьре,
Зи вилик карагна Лезгистан вири,
Зак илгьам кутур «Илгьамдин пери»!

Эхь, дамахда за хайи ч1алалди!
Эминан ч1алар я чаз гьалалди.
«Гомеран» зурба эдеб – камалди
Ийизва зи ч1ал къвердивай ч1ехи,
Зак илгьам кутур «Илгьамдин пери»!

Шаир! Куь т1вар за кьазва гьуьрметдив,
К1елиз а ч1алар сейли, дикъетдив,
Сидкьидай я заз вири истекдив,
Гьар са гаф серес, гьамга хьиз михьи,
Зак илгьам кутур «Илгьамдин пери»!

1979 й.