Дагъустандин кьилин шегьер тир Магьачкъалада и йисан эхирдалди вад лагьай сеферда ктабрин мекера (ярмарка) кьиле тухун къарардиз къачунва. Алатай йисуз «Тарки-Тау 2015» тIвар ганвай ктабрин мекерада Россиядин 5 ва Дагъустандин 13 чапханади иштиракнай. Алай йисуз и мярекатда Россиядин 10, Дагъустандин 14 чапханади кIелдайбурув чпин ктабар агакьарда. Мекерадин вахтунда Магьачкъаладиз Москвадай, Санкт-Петербургдай, Пермдай, Новосибирскдай, Красноярскдай, Ярославлдай, Волгограддай, Казандай, Грозныдай, Астрахандай мугьманар къведа.
Мекерадин сад лагьай югъ, адет тирвал, милли эдебиятрин югъ яз малумарда. Магьачкъаладин ктабханайра жуьреба-жуьре гуьруьшар, элкъвей столар, выставкаяр, конкурсар тешкилда. Чкадин чапханайрин директорри ва республикадин милли ктабханадин директорди милли эдебиятар хуьнин, абур электронный къайдайриз элкъуьрунин жигьетдай кьиле тухузвай кIвалахрикай ихтилатда.
Ктабриз бахшзавай чIехи мярекатда республикадин чара-чара халкьарин векилар тир шаирри, кхьирагри, журналистри, чIалан пешекарри, алимри мукьувай иштиракда, мекерадиз къвезвайбуруз чпин хсуси эсерар теклифда. Иниз мектебра, колледжра, институтра кIелзавай жегьилар мадни пара къведа. Абуру са жерге ктабрин презентацийра иштиракда, чапханайрин цIийи ктабар гъилик ийида, зарийрихъ галаз марагълу гуьруьшар тухуда.
Мярекатдин вахтунда Дагъустандин халкьдин алатрин гьукуматдин ансамблдин ва маса коллективрин концертарни кьиле фида. Са гафуналди, алай йисуз ктабрин мекера генани гурлуди жеда.
Муса МЕГЬАМЕДОВ,
Магьачкъала шегьер
"САМУР" газет
Добавить комментарий