И мукьвара "МАРВАРдин" 34 лагьай межлис кьиле фена. Межлисдин пуд йис тамам хьанва. ЦIийи эсерар кIелна, Шагьмардан муаллимди лугьузвай арияриз яб гана.
Лезги Няметан тIварунихъ галай литературадин конкурсдин гъалибни инал винел акъатна. И кас чи иер шаир ШАГЬМАРДАН АГЪАКИШИЕВ хьана. Гъалибдиз журналдин дипломни, премия гана.
Конкурсдиз 2I эсер атанвай. Шагьмардан муаллимдин эсер чIехи тефир аваз садлагьайди хьана. Шагьмардан муаллим чна барка ийизва. Квез мадни пара агалкьунар хьурай, ШАИР!
Агъадихъ чна гъалиб хьайи шиир гузва.
“АЛАМ” журнал
КАНИДИ
Шумуд шиир кхьиз чIурна хаз ахварин ширинвал,
Зи цIарара иервилив тек вун гьакьнач, каниди.
Тваз хьанач хьи и цIарара ви вилерин деринвал,
Рагьни гьакьна, Варзни гьакьна, тек вун гьакьнач, каниди.
Кхьена за муьгьуьббатдин цIаярикай датIана,
Кхьена за цуькверикай зар нехишар атIана,
Кхьена за канивилин гьар са легьзе кьатIана
Дердер гьакьна, гъамни гьакьна, тек вун гьакьнач, каниди.
Ви темендин верцивал жеч виртедивай туьхъуьриз,
Акъудна за рикIин къеняй цIалцIам гафар шуьткьуьриз,
ЦIарарикай мармар беден кан хьайтIани туькIуьриз
Шекер гьакьна, виртни гьакьна, тек вун гьакьнач, каниди.
Акьахна за Шагьдин синел эверайтIа, гьай гудан?
Ви багъдавай няметрикай минетайтIа, пай гудан?
Ашкъидикай, ви гуьгъуьна зун зверайтIа, цIай гудан?
Зи рекьера дуьня гьакьна, тек вун гьакьнач, каниди.
Шагьмардан я къекъвезвайди фикир, хиял кьакьанра,
Къвана марфар чуьхвенва зи кIвачин гелер аскIанра,
Уьмуьр фена хабар квачиз гагь "яманра", "хъсанра",
Зи бахтуна вири гьакьна, тек вун гьакьнач, каниди.
Добавить комментарий