“Аламдин” мад са ктаб

Бажиханум Исаева, "Дамаха къелем!" Баку, "Азербайжан" Чапхана, 2016.
И мукьвара уьлкведин меркезда чи мег рехи, зурба алакьунар авай шаир Бажиханум Исаевадин "Дамаха къелем!" тIвар алаз цIийи ктаб басма хьанва.
ЭчIехви Гьажи муаллимдин хизанда дидедиз хьайи Бажихануман гъвечIи чаварилий фолклордал, литературадал рикI алай. Шаирвал несиб хьайи адан бахтуниз гзаф йисара Ватандилай яргъара, Урусатдин Магадан вилаятда уьмуьрун акъатна. Гъурбатда багърийрихъ, Ватандихъ цIигелвили шаирдин илгьам мадни ифирна, гьакIни туькIуьрунра Кефер патан инсанрикай кхьенвай шиирри чка кьуна. Зари "Кефердикай ихтилат", "Зи гъед", "Хва канзава Ватандиз", "Муьгьуьббатдин рагъ" улубрин автор я.
"Ам дуьнядин гьар са чин акур, гафунин дуьняда гаф авай, мас авай инсан я,- кхьизва ктаб туькIуьрна адан "ТIалдиз тик килигзавай шаир" кьил ганвай сифте гафунин иеси шаир Гуьлалийрин Эйваза- Адан и поэзиядин кIунчIуна поэмаяр, шиирар, кьудар, гьакIни гъезелар ава. И поэзияди фитIиннавай афоризмайри, фагьумдин чIехивили, халкьдин руьгьдин хцивили Бажихануман шиирдин дуьнядиз чара ранг гузва.
Бажихануман шиирдин иервал анал ала хьи, адаз хьайи чIал хьиз поэзия, шиир, фолклорни хъсан чизва. Гьавиляй эсерар кIелунивай тух жезвач, адан руьгьдин кьакьанвилин, гьакIни михьи, дуру, чIехи ашкъидин шагьид жезва. Эхь, ашкъидин. Инсандин ашкъини гъа вич кьадар жеда. Шаирдиз кхьин патал тIал канда, шаирдин тIал, шаирдин ашкъи."
"Аламдин" улубар сериядикай тир 6-ктабда шаирдин шиирар, гъезелар, гьакIни "Кьвалан гав" ва "Ватандин дамахар" тIварар алай поэмаяр гьатнава.
Ктаб заридин стха Абубекир Къадирован такьатдалди экуьнал акъатнава.      

“КцIар”