Алай девир гьикьван четинди ятIани, чи жегьилрикай, хъсан кIелзавайбурукай илимдин рекьени бегьерлудаказ камар къачузвайбурукай чир хьайила, дугъриданни, чун шад жеда. ИкI, алатай йисан эхирра чи мад са викIегь руш — Саибат Тажидиновна Къазибегова (Гьемзеагъаева) — алимрин жергейра гьатнава. Аферин!
Гаф кватай чкадал лугьуз кIанзава, Саибат ДГУ-дин патав гвай Къуръан чирдай международный академический центрадин директор, “Лезги газетдихъ” галаз датIана алакъа хуьзвай Къазибегов Тажидин муаллимдин руш я.
С.Къазибегова 1984-йисуз Махачкъалада дидедиз хьана. Ина 29-нумрадин школада кIелна. Аял чIавалай кIелунрал, дерин чирвилер къачунал и назик рушан гзаф рикI алай. Уьмуьрда гьалтай вири четинвилериз дурум гана. Диде — Къизлер Гъаниевна — рагьметдиз фейила, рушан 4 йисни тамам хьанвачир. Амма бубадин тербия, Аллагьди гайи йикъал рази хьун, ажузвал тавун тир.
Гьеле школада амай йисара Саибата вичи гележегда гьи рекьяй чирвилер къачудатIа тайинарнавай. 2001-йисуз ам ДГПУ-дин математикадин факультетдиз гьахьзава. Университетдик экечIай сифте йикъалай ам тарсарив жавабдарвилелди эгечIна. Вичиз бегенмиш хьана, хкянавай пешедин сирер чируни адак мадни гьевес кутазвай. Улам четинди ятIани, рикIе къаст аваз кIелуни хъсан нетижаярни гана: 2007-йисуз Саибат Къазибеговади вуз яру дипломдалди — педагогикадай магистрдин дережа (степень) къачуналди — акьалтIарна. Гила ада илимдин рекье вичин къуватар ахтармишун кьетIна.
Гьавиляй, са кIусни вахт энгел тавуна, ада вичин документар ДГПУ-дин патав гвай аспирантурадиз вугана. Им 2008-йис тир. Илимдин кIвалах патал ада “Мультимедийные технологии в активизации познавательной деятельности будущих бакалавров педагогического образования (профиль математика ва информатика)” тема хкянавай.
2015-йисан майдин вацра ДГПУ-дин педагогикадай кандидатвилин ва докторвилин илимдин дережаяр хуьнин рекьяй Советдин къарардалди Саибат Тажидиновна Къазибеговадиз педагогикадин илимрин кандидатвилин тIвар гана. Россиядин Федерациядин образованидин ва илимдин Министерстводин патав гвай ВАК-ди и къарар алатай йисан эхирра тестикьарна.
Адан кIвалахдин илимдин руководитель педагогикадин илимрин доктор, профессор Тимур Гьажиевич Везиров, официальный оппонентарни педагогикадин илимрин доктор, профессор, Астрахандин гостехуниверситетдин алава профобразованидай Институтдин директордин заместитель Марьям Даниловна Ильязова ва педагогикадин илимрин кандидат, Кеферпатан Кавказдин федеральный университетдин информационный технологийрин ва телекоммуникацийрин институтдин информатикадин кафедрадин доцент — Ольга Петровна Панкратова тир.
2008-йисалай С.Къазибеговади ДГПУ-дин математикадин, физикадин ва информатикадин факультетдин информатикадин ва гьисабунардай техникадин кафедрадин ассистент ва ахпа старший преподаватель яз кIвалахна, алай вахтунда ада винидихъ тIвар кьунвай факультетдин алгебрадин ва геометриядин кафедрада старший преподаватель яз зегьмет чIугвазва. Саибат Тажидиновнадихъ гележегда илимдин мадни деринар ахтармишдай ниятар ава. Кандидатвилин тIвар тебрик авунихъ галаз сад хьиз, чаз адахъ мадни еке агалкьунар ва жегьил хизанда хушбахтвал хьун кIанзава.
Рагнеда Рамалданова
Лезги газет
Добавить комментарий