И мукьвара чна Дагъустандин халкьдин писатель Мегьамед-Расул Расулован 80 йис тамам хьунин юбилей къейдда. Яшар агьилбур ятIани, акунриз, рахунриз, къекъуьнриз килигна къимет гайитIа, садани адаз ахьтин яшар гудач.
Руьгьдиз жегьил и кас заз патавай чиз хейлин йисар я. РикIел алама: 1981-йисуз зун анжах Махачкъаладиз хтанвай. А чIавуз аяларни жаванар патал чапзавай “Кард” журналдин са йис тамам хьанвай. Журналдин сифтегьан нумрайриз къимет гун патал Дагъустандин писателрин Союзда махсус совещание кьиле фена. Лезги чIалал акъатнавай йисан нумрайриз къимет гун, абурун хъсан-пис терефрикай, мектебда ва хизанда абурухъ авай метлебдикай лугьун патал совещанидал рахун а чIавуз Самурдин юкьван школадай анжах хтанвай зал ихтибарна. Муаллим язни, журналдиз кхьизвай авторрикай сад язни, Педагогикадин илимдинни ахтармишунрин институтдин илимдин къуллугъчи язни зи фикиррихъ дикъетдивди яб акалнай, доклад макъала хьиз “Дагъустандин комсомолец” газетда чапнай.
Им а чIаван “Кард” журналдин кьилин редактор Мегьамед-Расулан теклифдалди авур кар тир. Гьа чIавалай инихъ чи танишвал халисан дуствилиз элкъвена. Мегьамед-Расула заз Даггизда гьазурзавай хейлин проектра иштиракдай, жуьреба-жуьре ксарикай очеркар кхьидай мумкинвал гана.
Мегьамед-Расул шад инсан я. АкI жеда, адаз туькьуьлвилер, магьрумвилер чир хьайиди туш. Амма… Адан эсерра къекъвейлани аквада хьи, гьеле аял яз хайи бубадал “халкьдин душмандин” буьгьтен вегьей хва, лугьудайвал, дидедин ценцик, адан акьул-камалдин таъсирдик, ахпани чIехи бубайринни бадейрин къаюмвилик кваз, гуьгьуьнлайни Советрин мектебда, Москвада литинститутда магьир устадрин гъилик тербияламиш хьана.
Уьмуьрдин тарсар ада гзаф кужумнава. Гьавиляй девирдин вири басрухрайни ам устадвилелди экъечIзава. Саки 25 йисуз ам чи республикадин ктабрин чапханадин кьиле акъвазна. Ктабханайрин, газетринни журналрин кьисмет гьихьтинди ятIа чаз аквазва. Дагучпедгиз лап фад квадарна. Даггизни “нез” кIанибур тIимил туш. Амма хуьзва Мегьамед-Расулан ирс, адетар… Гилан директор М.Гьамидовадин куьмекчи я Мегьамед-Расул. Вичин чирвилералдини, камалдални, амалдални хуьз алахънава чахъ авай халисан ктабрин къул. Чи уьлкведин ктабрин чIехи ярмаркайра, базарра, килигунра ина акъудзавай хейлин затIари чпиз муьштерияр ва шерикчияр жагъур тавуна туш.
Амма чапхана хуьн патал мадни артух алахъунар кIанзава. Са Мегьамед-Расулавай, са адахъ галаз яргъал йисара кIвалахзавай кьилин редактор Л.И.Голубевадивай, я фадлай кIвалахзавай устад редакторар — Н.Т.Шалбузовадивай, А.М.Къардашевавай, маса ксаривайни чапхана хуьз тахьун мумкин я. Государство а кардин къаюм хьун лазим я. Уьлкведа “культурадин революция” кьиле тухвай алатай асирдин 30-йисара арадал гъайи чапхана 90 йисан имтигьанрай экъечIна. Гила ам герекзамачни? Мегьамед-Расул Расулович герекзамайди субутзава…
Са шумуд алава. Адан къелемдикай “Мехъерилай гуьгъуьниз”, “Квез зун кIандани?”, “Хер алай чубарук”, “Хартумни Мадина”, “Ви 16 хьайила”, “ЧIулав кIел”, “Пайгъамбардин буба”, цIудралди маса ктабар, повестар, гьикаяяр хкатнава. Абур дарги, урус ва маса чIаларал чапдай акъатна. Ам Дагъустандин халкьдин писатель (1997), Республикадин СтIал-Сулейманан тIварунихъ галай (1974), Батыраян (1997) премийрин лауреат, СССР-дин печатдин отличник (1972) я.
Мегьамед-Расул Расуловичан 80 йис тамам хьун тебрикун яз чна адан “Аяндар ахмакь” тIвар алай ктабдай са чIук таржума авуна гузва.
Къуй ви къелем мадни хци, чIал, гьамиша хьиз, верцIи, Кубачидин заргаррин хьиз, зар алайди хьурай. Амин.
Мерд али Жалилов
Лезги газет
Добавить комментарий