Зун гъурбатдиз акъатна

Хайи чилел мугиз тахьай
Зун гъурбатдиз акъатнава.
Лезги кьуьлна ругиз тахьай
Ватандивай къакъатнава.
И цIарар вичихъ алакьунар авай жегьил шаир Вадим Цицик­видинбур я. Интернетда кьериз-цIаруз гьалтзавай адан шииррай Вадимахъ кьетIен илгьам ва вичин хатI авайди кьатIуз жеда.
Адилрин Вадим 1985-йисан 19-апрелдиз Стlал Сулейманан райондин Цицикрин хуьре  къванцин устlар Абдулазизан хизанда дидедиз хьана. Шиир кхьидай руьгь адак чIехи бубади – Дашдемир Адилова кутуна. Ада хъсан шиирар кхьидай. Касдал чан аламаз, 2010-йисуз Кьасумхуьрел кардик квай «Куьредин ярар» медениятдин меркезди Дашдемир Адилован «Кузва зи рикl, ялав галаз» тIвар ганвай шииррин кIватIал бас­ма авунай.
2002- йисуз хайи хуьре юкьван мектеб акьалтlарай Вадим Дагъустандин Гьукуматдин Педагогикадин Университетдин Дагъус­тандин филологиядин факультетдик экечlна. Ина кlелай йисара адан шиирарни макъалаяр «Лезги газетда» чап хьана. 
2007-йисуз университет акьалтlарай жегьилдивай дидед чlаланни литературадин муаллимвиле  кIвалахиз хьанач. Кьисметди ам яргъариз - Хабаровск шегьердиз акъудна. 2007- 2009 - йисара ана къенепатан крарин органра къуллугъна.
2009-йисуз хизан туькIуьрай Вадим са йисалай Ватандиз мукьвал тир Ростов шегьердиз куьч хьана. Алай чlавуз ада Рос­товда вичин свас - лезги руш Маинадихъ, кьве хцихъ - Мегьамедахъ ва Абдулазизахъ галаз санал уьмуьрзава. Шиирар кхьин адан рикI алай машгъулат я.

Самур газет

Вадим Адилован шиирар