Мегьбубе Агъаева заз «Марвар» кIватIалдин межлисдал акуна чир хьана. Чун гьа сифтедилай вичин алакьунрив гьейранариз, канариз алакьна адалай.
Ингье, зи гъиле кхьирагдин «Узагдан башланан йол» («Яргъалай гатунзавай рехъ») тIвар алай ктаб ава. Ам Мегьбубе ханумдин чапдай акъатнавай кьвед лагьай ктаб я. Кьве чIалал: гьам Азербайжан, гьам лезги чIаларал туькIуьрунар гьатнавай и ктабдавай шиирар, публицистикадин кхьинар, драмадин эсерар, эссеяр са-сад кIелзава за...
Муьгьуьбатдин лирикади адан поэзияда кьетIен чка кьазва. Сая чIалалди туькIуьрнавай и шиирар гуьгьуьлдиз таъсирдайбур я:
Жегьил чIавуз вун зи вилин нур хьана,
Вун зун патал, зи уьмуьрдин зур хьана.
Гила вучиз, лагь, араяр чIур хьана,
Зун галачиз вавай дуьня гьал жедан?
(«Зун галачиз»)
Са маса шиирда адан цIийи, оригинал фикирар хуш къвезва заз:
Секинвили фул кутазва зи тандихъ,
Вацран эквер йиф паталди цIай жеда.
Къайи йифиз ваз эверна мукьувдихъ,
Ви чкадал цава гъетер рахада.
Гьеле гума зав ви ашкъи михьи тир,
ТIвекнатIани ви ашкъиди рикIе зи.
Квахьна йифер вахъ галаз зи алатай,
Вун галачиз дуствална заз йифери.
(«Йифер»)
Мегьбубе ханумдин Ватандиз, диде-бубадиз, хайи чилин иер тIебиатдиз, лезги рушариз талукьнавай шиирарни рикIе амукьдайбур я.
Актрисавилин талант авай, мажал жагъурна сегьнедал роларни тамамарзавай Мегьбубе Агъаевади вичин къелем драматургиядин рекьени кардик кутазва. «Лале» тIвар алай гъвечIи драмадин эсер чи уьмуьрда фад-фад гьалтзавай са проблемадикай-эрекь себеб яз хизанар чкIунин, фитне, буьгьтэн себеб яз инсанар са-садавай чара хьунин месэладиз талукьнава.
Адан прозада инсанрин уьмуьрда гьалтзавай татугай, усал гьаларин шикилар аквазва чаз. Са гьикаяда диде-бубадин къайгъудикай хкатнавай, чIана хесет квай бадедин хурук чIехи хьана, пис рекьера гьатнавай Сеймуран туькьуьл уьмуьрдикай, чIуру яз куьтягь жезвай эхирдикай кIелдамаз чир жезва хьи, ам гьакI кхьизвайдан фантазия туш, чи уьмуьрда ихьтин гьалар гьайиф хьи, гзаф дуьшуьш жезва алай девирда.
Ктабда Мегьбуба ханумди Азербайжан чIалай лезги чIалаз элкъуьрнавай са драмадин эсерни гьатнава. Фируз Мустафадин «Севрен хъвер» тIвар алай и эсердин элкъуьрун са тIимил гъалатIриз килиг тавуна хъсанди я.
ГъалатIрикай гаф кватай чIавуз лугьун герек я хьи, Мегьбубедин шииррани абур сад-кьвед авазва: бязи цIарара гьижайрин сан пара я, дуьз пай хьанвач. Месэла:
Мехъер чIавуз виридан рикIер шад жеда,(12)
Ватандани лап хъуьтIуькай гад жеда,(11)
Лезги рушан рикIе ниятар сад жеда,(12)
Къизилгуьлдин атир адаз яр жеда,(11)
Мурад я, ярдихъ галаз санал жен.(10)
Завай хьайитIа:
Мехъер чIавуз элдихъ галаз санал жен.
Мехъер чIавуз вири рикIер шад жеда,
Ватандани лап хъуьтIуькай гад жеда.
Лезги рушан рикIе ният сад жеда,
Къизилгуьлдин атир адаз яр жеда,
Зи мурад я, ярдихъ галаз санал жен. - кхьенайтIа, мадни хъсан тир.
Чна адаз мадни хъсан эсерар, агалкьунар мурадзава. ГьакI хьунал чун чIалахъни я, вучиз лагьайтIа, адахъ шаирдин руьгь, чIехи гьевес, гуьгьуьлдин кьуват акуна чаз.
Эхирдай лугьун хьи, Мегьбубе ханум «Марвардин» цIиргъиник акатунал чун шад я, къведай межлисрани чна адан рехъ хуьда.
Иер ванцив лугьузвай манийрин, аваздив кIелзавай шииррин рехъ баркаван хьурай ви!
Римма
"Кцlар" газет
Добавить комментарий