Ватандин гъед

Ватандин ЧIехи дяведин ветеран, рагьметлу Рамазан АБДУЛЛАЕВАН экуь къаматдиз 

РикIел къвезва четин йисар,
Тарихдикай рахайла...
Ухьт алахьиз шехьзава чун,
Дяве рикIел хтайла.
Алатзамач гьич рикIелай
Авур гужар душманди...
Даим рикIяй акъатиз гум,
Уьмуьр хьанай пашманди.
Хуьз фенай вун диде-Ватан,
Шарвили хьиз экъечIна.
Ватан патал эцигна чан,
Тергиз душман эгечIна.
Вилик жерге кьушунрин чи -
Офицер яз хьанай вун.
Душманд вилик рекьер атIуз,
Берлиндиз кьван фенай вун -
РикI хци тир къагьриман хва,
Яру пайдах гъилевай,
Душман тергна, жуван Ватан
Азад ийиз рикIевай.
Игит кьегьал, са чIавузни
Ви чандик кичI кваз хьанач.
Гьавиляй ви рикIин сергьят
Душманривай кьаз хьанач.
Чуьхвенай на дяведин тур
Чи душманрин ивидал.
Орденривди ацIурна хур,
Хтанай вун еридал.
Кьасумхуьруьн школада
Ви сес ама, хатI ама.
“КIела, чан хва! КIела, чан руш!” -
Лагьай гафар мад ама.
Фена вахтар... Фена йисар...
На гъиле кьур кар ама.
ЧIехи регьбер, чи сивера
Ви гьунарлу тIвар ама...