Теселли

Цуьквед храй на къатадай чемендал,
Зул алукьна, акьалтнава семен ранг.
Бенд яз тамир а ви ифей теменрал.
Вун кьуьзуь жез гьайиф тушни, я шаир?

Иервилер, гуьзелвилер саймишай,
Халкьдин дердер жуванбур хьиз дадмишай,
Хайи чилихъ рикI цIуруриз, агъмишай,
Вун кьуьзуь жез гьайиф тушни, я шаир?

Акур чIавуз шадвал ргаз вилера,
Руьгь ацукьрай ви рушарин къуьнерал,
Низ тапшурмиш ийида и чилерал.
Вун кьуьзуь жез гьайиф тушни, я шаир?

Чилин атир, цавун нурар нуш аваз,
Вилералди рекье турвал ацIай варз.
Ихтибардай кас гьатдани, лагь, на ваз.
Вун кьуьзуь жез гьайиф тушни, я шаир?

РикIе зенгер - кIанивилин авазрин,
Куьтягь тежер гьевеслувал ава зи.
Ийизвай кьван на таватриз тавази,
Вун кьуьзуь жез гьайиф тушни, я шаир?