Кьеб

Ингье кьеб вилик ква зи лап куьгьне,
Кьве вишелайни артух я яшар.
Зунни хьайиди я адан къене,
Зани авуна гьисс адан тангар.

Гьа тангари заз ачухна цавар,
Ачухна рекьер уьмуьрдин четин.
Йифериз ийиз туна зав ахвар,
Йикъар атайла авуна секин.

Лай-лай ягъиз заз гьа-гьа тангари,
Дидедихъ галаз кIвалахна санал,
ТIвар фирай лугьуз гзаф яргъариз,
Тангарни диде алахъна санал.

Садазни регъуь жен тийидайвал,
Зун пака итим хьайи береда,
Чиниз са рехне къвен тийидайвал,
Тербия гана чпин жуьреда.

Ингье а кьеб мад ала къуллугъдал,
Мад тангар инихъ-анихъ ялзава.
Дидеди, чидай а тангарин чIал,
Куьгьне кьепIинин аявалзава.

Хьурай лугьуз мад са кьегьал чIехи,
Къадир авай и кьепIин, тангарин.
Авай къадир и чилерин рехи,
Къадир авай и векъи дагъларин.