Гьар шаирдин вичин буржи

Гьар шаирдин вичин буржи:
Дуьз гафар жагъурна кIанда. 
Юлдашарин чIехи - гьвечIи 
Бейтерал юзурна кIанда.

Мезни кIанда чиз рахадай, 
Гьам векил жен жуван патай, 
Гьар са кардив вичив кьадай 
ЧIалар гьакI туькIуьрна кIанда.

Метлеб гзаф, гафар куьруь, 
Михьибур жен, ири - ири, 
Гъавурда юлдашар вири 
Твадай, - гьакI фикирна кIанда.

Жув хъсан гъавурда гьатиз, 
Дуьньядикай са затI кьатIиз, 
Лазим гафар жува кIватIиз, 
Усалбур юзурна кIанда.

Гагь жеда лап четин гьалар, 
И шаирриз кIеви тIалар, 
Жуваз герек тир а чIалар 
Сад садак кукIурна кIанда.

Са зерре кьван айиб, хата 
Титан герек жуван пата. 
Заманада вуч аватIа, 
Ахтармишиз чирна кIанда.

СтIал Сулейманан къилих:
Авай гаф тавун я чуьнуьх. 
Гьар шаирди вичин ишигъ 
Экв гуз гьакI куькIуьрна кIанда.

1935